ەلىمىزدە يتبەگىلىك ونەرى رەسمي تۇردە تىركەلەدى
بۇل تۋرالى ق ر مادەنيەت جانە سپورت مينيسترلىگى، سپورت جانە دەنە شىنىقتىرۋ ىستەرى كوميتەتىنىڭ ۇلتتىق سپورت تۇرلەرى باسقارماسىنىڭ باسشىسى مەيرامبەك ماحامبەتوۆ ءمالىم ەتتى، دەپ حابارلايدى قازاقپارات ءتىلشىسى.
«قازاقتىڭ ۇلتتىق قۇندىلىقتارىنىڭ ءبىرى بولىپ تابىلاتىن تازى مەن توبەتتى ساقتاۋ جانە ولاردى ناسيحاتتاۋ ماقساتىندا ءمينيستردىڭ بۇيرىعىمەن ارنايى جۇمىس توبى قۇرىلدى. ونىڭ قۇرامىندا وسى سالا ماماندارى، يتبەگىلەر جانە باسقا دا قۇزىرەتتى ورگان وكىلدەرى بار. ماقسات - تازى، توبەت فەدەراتسياسىن اككرەديتاتسيادان وتكىزۋ. سەبەبى بۇگىندە اتبەگىلىك پەن قۇسبەگىلىك ونەرى اككرەديتاتسيادان ءوتىپ، رەسمي تۇردە تانىلعان. ەندىگى ۋاقىتتا يتبەگىلىك ونەردى رەسمي ەتىپ، رەسپۋبليكالىق سپورتتىق شارالار كۇنتىزبەسىنە ەنگىزبەكپىز. «قانسونار» قوعامدىق قاۋىمداستىعىنىڭ دەرەگىنە سۇيەنسەك، بۇگىندە ەلىمىز بويىنشا ءتولقۇجاتى بار 1500 دەي تازى جانە 100 گە جۋىق توبەت بار. ال رەسمي ەمەس دەرەك بويىنشا قازاقستاندا 40 مىڭعا جۋىق تازى مەن توبەت بار. ونىڭ ىشىندە ارالاس تۇقىمداستار دا كەزدەسەدى»، - دەدى مەيرامبەك ماحامبەتوۆ.
ونىڭ ايتۋىنشا، ەلىمىزدىڭ بارلىق وڭىرىندە تازى مەن توبەت بولىمشەلەرىن اشۋ جوسپارلانۋدا.
«يتبەگىلىكتى رەسمي تۇردە ۇلتتىق سپورت ءتۇرى دەپ تانيتىن بولساق، دەمەك تازى مەن توبەتتەردى تىركەپ، ولارعا ءتولقۇجات بەرىلۋ قاجەت. ول ءۇشىن ءبىز الدىمەن مەملەكەتتىك باعدارلامانى بەكىتەمىز. ول باعدارلامادا تازى مەن توبەتتى ساقتاۋ، قورعاۋ، دامىتۋ جانە ۇلتتىق برەند رەتىندە ناسيحاتتاۋعا قاتىستىنىڭ بارلىعى قامتىلادى. ەرەكشە ايتىپ وتەتىن ءسات، ءبىز وسى باعدارلاما اياسىندا ەلىمىزدە يت توبەلەسىن ۇيىمداستىرۋعا تىيىم سالماقپىز»، - دەيدى ول.
