بۋراباي اۋدانىندا ساياتشىلىق ونەرى ناسيحاتتالدى
«وسىدان 2 جىل بۇرىن اقمولا وبلىسىندا «سالبۇرىن» اڭشىلىق ورتالىعى قۇرىلدى. ماقسات - اتادان قالعان ءداستۇردى كەلەشەك ۇرپاققا جەتكىزۋ. ساياتشىلىق ونەردى جوعالتپاي، كەرىسىنشە دارىپتەۋ. بۇل دەگەنىمىز تەك اڭ اۋلاۋ عانا دەگەن ءسوز ەمەس. ونىڭ وزىندىك پايداسى جەتەرلىك. ايتار بولساق، اتقا ءمىنۋ ادام دەنساۋلىعىنا پايدالى، يت ۇستاۋ ادامدى شيراقتىلىققا ۇيرەتەدى جانە تاعى باسقا. بۇگىندە ءبىزدىڭ ورتالىققا قاراستى 200 مىڭ گا جەر بار، وندا اڭنىڭ بارلىق ءتۇرى كەزدەسەدى. سونداي- اق، اڭشىلىققا قاجەتىنىڭ ءبارى بار. ياعني ءوزىمىزدىڭ اڭشىمىز، اتىمىز، تازىمىز جانە باسقا دا اڭشىعا قاجەتتى بۇيىمدار»، - دەدى «سالبۇرىن» ۇلتتىق اڭشىلىق ورتالىعىنىڭ ديرەكتورى، اتالعان شارانى ۇيىمداستىرۋشى قانات احمەتوۆ.
كوپشىلىك الدىندا اڭشىلىق ونەردى ناسيحاتتاۋ ءۇشىن 2 يتبەگى، 1 بۇركىتشى جانە قاعۋشى اڭعا شىعىپ باق سىنادى.
«ەلىمىزدە ساياتشىلىق ونەردى ۇلىقتايتىن 2 ورتالىق بار. ءبىرى وسى اقمولا وبلىسىندا، ەكىنشىسى الماتى وبلىسىندا. ءبىز قازىرگى ۋاقىتتا اڭشىلىق ونەردى كەڭىنەن ناسيحاتتاۋ ءۇشىن ونى كوپشىلىككە دەمالىس ءتۇرى رەتىندە ۇسىنۋدامىز. ياعني اڭشىلىقتى تۋريستىك قىزمەت ءتۇرى دەۋگە بولادى. ودان بولەك، اڭ اۋلايمىن، اتقا مىنەمىن، تازى ۇستايمىن دەۋشى قىزىعۋشىلار بولسا، ءبىز ولارعا ۇيرەتەمىز. سول سياقتى اڭشىلىق ونەردەن باسقا دا ۇلتتىق داستۇرلەرىمىزدى دارىپتەپ كورسەتەمىز»، - دەيدى «قانسونار» رەسپۋبليكالىق قاۋىمداستىعىنىڭ باسقارما ءتوراعاسى ورالباي ابدىكارىموۆ.
ايتا كەتەيىك، بۋرابايداعى ساياتشىلىق ونەردى ناسيحاتتاۋ ماقساتىندا باق وكىلدەرىنە ارنالعان باسپا ءسوز تۋرى ءوتتى.
