تۇركىستاننان شىققان جاياۋ ەكسپەديتسيا ماڭعىستاۋعا جەتتى
سارسەنباي ەرقاسىموۆ ءابۋ ناسىر ءال- ءفارابيدىڭ تۋعان جەرى تۇركىستان وبلىسىنىڭ ءشاۋىلدىر اۋدانىنان باستاپ، جالپى اۋماعى 1500 شاقىرىم جولدى ارتقا تاستاپ، 362 اۋليەلى ماڭعىستاۋ وبلىسىنىڭ بەينەۋ اۋدانىنا تابان تىرەدى. ول بۇل ساياحاتىن بەكەت اتانىڭ 270 جىلدىعى، ءال- فارابيدىڭ 1150 جىلدىعى، ابايدىڭ 175 جىلدىق مەرەيتويلارى قۇرمەتىنە ارنايدى.
ەكسپەديتسيانىڭ ماقساتى قازاق جەرىندەگى قاسيەتتى جەرلەردى ارالاپ دۇعا ەتۋ، ەل مەن جەردىڭ اماندىعى مەن بۇتىندىگى، جارقىن بولاشاعى ءۇشىن تىلەك تىلەۋ، قازاق حالقىنىڭ رۋحاني تانىمدارىن سانادا جاڭعىرتۋ، كيەلى ورىندار مەن تاريحي تۇلعالاردى ۇلىقتاۋ، بەيىتتەرىنە زيارات ەتۋ، جاس ۇرپاققا ادام بويىنداعى جان مەن ءتاننىڭ مۇمكىندىگىن كورسەتۋ، ەلىمىزدەگى رۋحاني- مادەني تۋريستىك ورىندارعا سەرپىن بەرۋ جانە نازار اۋدارتۋ. ەكسپەديتسيا 2-قازاندا ءشاۋىلدىر كەنتىنەن باستالعان.
«قاسيەتتى ساپار» - «ەlsana Amanat» قوعامدىق قورى مەن «نۇرقاسىم اتا» جەكە قورىنىڭ بىرىككەن جوباسى. «قاسيەتتى ساپار» شاراسى قازاقستان استاناسى مەن ءتورت وبلىستىڭ اۋماعىن قامتيدى، ياعني نۇر- سۇلتان قالاسى، تۇركىستان، قىزىلوردا، اقتوبە، ماڭعىستاۋ وبلىستارى. ساپاردىڭ جول ۇزاقتىعى شامامەن - 1500 شاقىرىم، مەرزىمى – 1 ايدان استام ۋاقىت.
