ەلىمىزدىڭ ەكى قالاسى كارانتينگە جابىلادى
قاۋىپتى ىندەتتىڭ ەكىنشى تولقىنى تارايتىنىن اق حالاتتىلار الا جازداي ايتىپ، جۇرتتى مەيلىنشە ساقتىق شارالارىن ۇستانۋعا شاقىرعانمەن قۇلاق اسپاعاندار كوپ- اق. تىعىلىپ توي جاساعاندار مەن توپتالىپ جيىن- كەشتەر وتكىزگەن جۇرتقا قانشا ايىپپۇل ارقالاتقانمەن ساباق بولمادى. بۇل دا ىندەتتى ەسىگىمىزدەن ەنگىزىپ الۋىمىزعا جول اشتى. مەديتسينا ماسكاسىن يەككە قاراي يتەرە سالىپ، وزگەنى ەمەس، ءوزىن الداپ جۇرگەندەر قانشاما. حوش، وسى اپتادا ەپيدەميولوگيالىق احۋال كۇردەلەنىپ، كارانتين تالاپتارى كۇشەيگەن وڭىرلەرگە توقتالايىق، شولىپ كورەيىك.
پەتروپاۆل كارانتينگە جابىلادى
سولتۇستىك قازاقستان وبلىسىندا ەپيدەميولوگيالىق جاعداي كۇردەلى. پەتروپاۆلداعى ينفەكتسيالىق ستاتسيونارلاردا 276 ناۋقاس ەمدەلىپ جاتىر. 16 ناۋقاس جانساقتاۋ بولىمىندە جاتىر. ءوڭىردىڭ باس سانيتار دارىگەرىنىڭ قاۋلىسىنا سايكەس كارانتين تالاپتارى كۇشەيتىلىپ، پەتروپاۆل قالاسى مەن قىزىلجار اۋدانى 9 - قاراشادا كارانتينگە جابىلاتىن بولدى. قالاعا كەدەرگىسىز كىرىپ- شىعاتىن كاسىپورىنداردىڭ ءتىزىمى جاسالىپ جاتىر. ازىق- تۇلىك پەن مەديتسينالىق پرەپاراتتاردى تاسىمالدايتىندار ەركىن ءجۇرۋ ءۇشىن جاسىل ءدالىز ۇيىمداستىرىلادى. ولار پ ت ر تەست انىقتاماسىنسىز بوگەت بەكەتتەردەن وتە الادى. ءىرى ساۋدا ورىندارىنىڭ جۇمىس ۋاقىتى دا قىسقارادى. دەمالىس كۇندەرى قوعامدىق كولىك توقتاپ، ءبىرقاتار نىساندار جابىلادى.
قوستاناي قالاسى ەكى اپتاعا جابىلادى
ەپيدەميولوگيالىق احۋالدىڭ كۇردەلەنۋىنە بايلانىستى قوستاناي قالاسى ەكى اپتالىق كارانتينگە جابىلاتىن بولدى. بۇل وڭىردەگى جەدەل شتاب وتىرىسىنىڭ قابىلداعان شەشىمى. قازىر قاۋلى ازىرلەنىپ جاتىر. الداعى دۇيسەنبىدەن باستاپ وبلىس ورتالىعى ءار جەردەن بلوك- بەكەتتەرمەن قورشالادى. ىندەت جۇقتىرۋشىلاردىڭ كۇن سايىنعى ءوسىمى 10 نان اسقان ەلدى مەكەندەردە دە سانيتارلىق بەكەتتەر قويىلادى. بۇدان بىلاي قولىندا پتر انىقتاماسى جوق ازاماتتار وبلىس اۋماعىنا كىرە المايدى. كەشكى ساعات 9 دان تاڭعى 6 عا دەيىن تۇرعىنداردىڭ ءجۇرىپ تۇرۋىنا شەكتەۋ قويىلدى. سونىمەن بىرگە تاكسي مەن اۆتوبۋستاردىڭ قاتىناۋ ۋاقىتى قىسقارادى. بۇعان دەيىن جۇمىس ىستەپ كەلگەن سۇلۋلىق سالوندار، شاشتارازداردىڭ قىزمەتى جەكسەنبى كۇنى توقتاتىلادى.
شىعىس «قىزىل ايماققا» ەندى
شىعىس قازاقستان وبلىسى كوروناۆيرۋس ينفەكتسياسىن جۇقتىرۋ دەرەگى بويىنشا ءالى دە الدا تۇر. ايماقتا اۋە جانە تەمىرجول رەيستەرى قىسقارتىلىپ، سانيتارلىق بەكەتتەر قويىلسا دا، جاعداي كۇردەلى كۇيىندە قالىپ كەلەدى. قازىر ءوڭىر «قىزىل ايماققا» ەنىپ وتىر. سوڭعى تاۋلىكتە ەلىمىزدە 591 ادامنان قاۋىپتى دەرت انىقتالسا، سونىڭ 250 ى شىعىس قازاقستان وبلىسىندا. ۆيرۋس جۇقتىرعان 91 ادام وسكەمەن قالاسىندا، 42 ادام سەمەي قالاسىندا تىركەلگەن. شالعايداعى قالالار مەن ەلدى مەكەندەر اراسىندا ريددەر قالاسى مەن گلۋبوكوە اۋدانى كوش باستاپ تۇر. ءبىر تاۋلىكتە 30 دان استام ادام ينفەكتسيا جۇقتىرىپتى. بۇگىنگى تاڭدا ايماقتا 689 ادام ستاتسيوناردا ەمدەلىپ جاتىر.
الماتى وبلىسىندا كارانتين شارالارى كۇشەيتىلدى
ايماقتىڭ شىعىس قازاقستان وبلىسىمەن شەكتەسەتىن جەرىنە سانيتارلىق بەكەت قويىلدى. قوعامدىق تاماقتانۋ ورىندارىنا باراتىن ادام سانى شەكتەلدى. كومپيۋتەرلىك كلۋبتار، جابىق كەشەندەگى اتتراكتسيوندار، بيليارد، بوۋلينگ ورتالىقتارى سەكىلدى كوڭىل كوتەرۋ ورىندارى جابىلادى. مادەني- سپورتتىق، جانۇيالىق ءىس- شارالاردى وتكىزۋگە تىيىم سالىنادى. قوعامدىق كولىكتەر تاڭعى 06:00 مەن 10:00 جانە كەشكى 17:00 مەن 20:00 ارالىعىندا جۇرەدى. ايماق تۇرعىندارىنىڭ كوپشىلىك ورىنداردا ماسكا تاعىپ ءجۇرۋى مەن ءۇش ادامنان ارتىق جينالماۋلارىنا قاتىستى تالاپ كۇشەيتىلدى. 65 جاستان اسقان ازاماتتاردىڭ كوشەگە شىعۋىنا شەكتەۋ قويىلادى. پاۆلوداردا بلوكبەكەتتەر قويىلۋى مۇمكىن پاۆلودار وبلىسىندا جاڭادان 70 كە جۋىق ادام كوروناۆيرۋس ينفەكتسياسىن جۇقتىرعانى انىقتالدى. سوندىقتان كارانتيندىك شارالار تۋرالى قاۋلىعا وزگەرىستەر ەنگىزىلگەن. قالا ماڭىنداعى جولاۋشىلار تاسىمالىنان باسقا قالاارالىق جانە اۋدانارالىق اۆتوبۋستار توقتاتىلادى. تەاتر، مۋزەي، كىتاپحانالاردىڭ، ءدىني نىسانداردىڭ قىزمەتىنە ۋاقىتشا تىيىم سالىنادى. كارانتين كەزىندە بارلىق جينالىستار مەن وتىرىستار ونلاين رەجيمگە اۋىستىرىلادى. وبلىس ورتالىعىندا سەنبى، جەكسەنبى كۇندەرى قوعامدىق كولىكتەر قاتىنامايدى. ءىرى ساۋدا ۇيلەرى، ويىن- ساۋىق ورتالىقتارى، جالپى اۋماعى 800 شارشى مەتردى قۇرايتىن ونەركاسىپتىك ساۋدا ورىندارىنىڭ جۇمىس ۋاقىتى قىسقارادى. كارانتيندىك شەكتەۋلەر الداعى دۇيسەنبىدەن باستاپ كۇشىنە ەنەدى. جاعداي ۋشىقسا، بلوكبەكەتتەر قويىلۋى مۇمكىن. بارلىق كارانتيندىك شەكتەۋلەر قاراشانىڭ 9 ىنان باستاپ كۇشىنە ەنەدى.
ىندەتكە شالدىققانداردىڭ ءبارى زەينەتكەر
باتىس قازاقستان وبلىسىندا دا ءبىر كۇندە 49 ادامنىڭ كوروناۆيرۋس ينفەكتسياسىن جۇقتىرعانى انىقتالدى. اسىرەسە اۋىر جاعدايداعى ناۋقاستار سانى ارتقان. قازىرگى تاڭدا 10 ادام جانساقتاۋ بولىمىندە جاتىر. قاۋىپتى ىندەتكە شالدىققانداردىڭ بارلىعى زەينەت جاسىنداعى ادامدار. وڭىردە ءبىرقاتار شەكتەۋ ەنگىزىلگەن. دەمالىس كۇندەرى وبلىستا ساۋدا ۇيلەرى مەن بازارلار جۇمىس ىستەمەيدى. ورال قالاسىنىڭ سانيتارلىق باس دارىگەرىنىڭ قاۋلىسىمەن 65 جاستان اسقان ازاماتتارعا سەبەپسىز سىرتقا شىعۋعا تىيىم سالىنعان بولاتىن. ەندى بۇگىننەن باستاپ ساعات 23:00-دەن تاڭعى 06:00-گە دەيىن جەكە كولىكپەن ءجۇرۋ دە توقتاتىلاتىن بولدى.
«توي جاساماڭدار، تويعا بارماڭدار، ەلدەگى ەپيدەميولوگيالىق احۋال تۇزەلگەنشە شىداڭدار» دەگەن ۇندەۋ مەن شەكتەۋگە پىسقىرمايتىندار ايىپپۇلدان دا قايمىقپايتىن سياقتى. وزگەنىڭ ومىرىنە قاۋىپ ءتوندىرۋى مۇمكىن ەكەنىن تۇيسىنبەۋدىڭ سوڭى وكىنىشكە اپارادى. اعايىننىڭ كوڭىلىن قالدىرمايمىن دەپ وسىنداي تويعا بارىپ ۆيرۋس جۇقتىرعان تالاي ادام ءومىر مەن ءولىم اراسىندا ارپالىسىپ جاتقانىن تۇسىنبەيتىن جۇرتقا نە داۋا؟ كۇنى كەشە عانا شەكتەۋلەرگە قاراماستان قىزىلوردا وبلىسىندا ۇيلەنۋ تويىن جاساعان 19 دەرەك انىقتالدى. 17 وتباسى تويدى ءوز اۋلاسىندا، ال ەكەۋى مەيرامحانادا وتكىزگەن. توي جاساعان جەكە تۇلعالار 800 مىڭ تەڭگەگە جۋىق ايىپپۇل تولەيدى. بۇدان بولەك، كاسىپكەرلىك نىساندار دا سانيتارلىق تالاپتاردى ساقتاماعان بولىپ شىقتى. بيىل 5 شىلدەدەن بەرى قىزىلوردا وبلىسىندا ارنايى توپتار 3 مىڭنان استام كاسىپكەرلىك نىسانعا تەكسەرۋ جۇرگىزگەن. 804 كارانتين تالاپتارىن بۇزۋ دەرەگى تىركەلىپ، ولارعا 40 ميلليون تەڭگەگە جۋىق ايىپپۇل سالىنعان.
ساۋدا ورتالىقتارى، ءدامحانالار، كافەلەر قاتاڭ سانيتارلىق ەرەجەگە سالاقتىق تانىتقان. بارلىعى اكىمشىلىك جاۋاپكەرشىلىككە تارتىلعان. الەمدەگى قۋاتتى مەملەكەتتەر دارمەنسىزدىك تانىتىپ وتىرعان مىنا ءقاۋىپتى ۆيرۋس جانە ونىڭ سالدارى جەڭىل بولمايتىنى انىق. قازاقستان سياقتى دامۋشى ەلدەردىڭ بيزنەسى باياۋلايدى، تابىسى تومەندەيدى، ەكونوميكاسى ەسەڭگىرەيدى. ال، ادام شىعىنى ورنى تولماس وكىنىش. سوندىقتان، ساقتانايىق اعايىن. جاقىنىڭىزعا جاناشىر بولىڭىز، ءوز ءومىرىڭىزدى ويلاڭىز.
اۆتور: ءالىمحان قانات ۇلى
