قوردايدا قازاق پەن دۇنگەننىڭ تاتۋلىعى جايلى «تاعىلىم» فيلمىنىڭ تۇساۋى كەسىلدى
ۇلتتار دوستىعى سۋرەتتەلگەن تۋىندىعا اۋدان اقساقالدارى مەن اۋدان اكىمدىگىنىڭ ءبولىم باسشىلارى قاتىسىپ، وڭ باعاسىن بەردى، دەپ حابارلايدى قازاقپارات ءتىلشىسى.
فيلم ەكى دوستىڭ قارىم-قاتىناسى جايىندا تۇسىرىلگەن. ناقتىراق ايتساق، قازاق پەن دۇنگەن ۇلتى وكىلدەرىنىڭ دوستىعى تۋرالى. ونىڭ بارىسىندا وسىدان 140 جىل بۇرىن دۇنگەن ۇلتىنىڭ قازاق جەرىنە كەلىپ قونىستانعان ۋاقىتى سۋرەتتەلەدى.
وندا قازاق ەلىنىڭ قوناقجايلىعى ادەمى كورىنىس تاۋىپ، پانا ىزدەپ كەلگەن قوناعىنا قونىسىنان جەر بەرىپ، باۋىرىنا باسقانى كورىنىس تاپقان. سول ۋاقىتتا كىشكەنتاي ماعجان شيمارمەن ايىرىلماس دوس بولىپ، ولاردىڭ جاقىندىعى بۇگىنگى ۇرپاعىنا دەيىن جالعاسقانىن وسى ءبىر تۋىندى اسەرلى جەتكىزگەندەي.
ءبىر جارىم عاسىرعا جۋىق ۋاقىت بىرگە كۇن كەشىپ، تالاي سوقپاقتان بىرگە ءوتىپ، قىزىق-قيىنشىلىقتى قاتار كورىپ كەلەدى. سول 140 جىلدىق دوستىقتى ءبىر تۋىندىعا سىيعىزعان «تاعىلىم» كينوسى تالايدىڭ كوڭىلىنەن شىعاتىنىنا سەنىم مول.
فيلمدى بىرگە تاماشالاعان قازاق جانە دۇنگەن اقساقالدارى سوڭىرا ءسوز الىپ، كينودان العان اسەرىمەن ءبولىستى. تاريحتى قوزعاعان قاريالار ەكى ۇلتتىڭ اراسىنداعى دوستىقتىڭ جارقىن ساتتەرى تۋرالى اڭگىمەلەپ، سول ۇيلەسىمدىلىك الداعى ۋاقىتتا جالعاسا بەرەتىنىنە سەنىم ءبىلدىردى.
قۇشاق اشىپ، قول ۇستاسقان دوستىق سوڭى ەستەلىك سۋرەتكە ءتۇسىپ، ءماز مەيرام بولىپ تارقاستى.
ايتا كەتۋ كەرەك، اۋدان پروكۋراتۋراسىنىڭ ۇلتارالىق كەلىسىم جوسپار-جوباسىن جۇزەگە اسىرۋ بارىسىندا اۋدان اكىمدىگىنىڭ قولداۋىمەن جارىققا شىققان دۇنيە جۋىردا بارشا كورەرمەنگە جول تارتپاق.
