ەلىمىزدىڭ ۋنيۆەرسيتەت جۇيەسىن تۇبەگەيلى رەتتەيتىن ۋاقىت كەلدى - اقىلبەك كۇرىشبايەۆ
بۇل تۋرالى ق ر پرەمەر-ءمينيسترى اسقار مامينگە دەپۋتاتتىق ساۋال جولداعان اقىلبەك كۇرىشبايەۆ ايتتى، دەپ حابارلايدى قازاقپارات ءتىلشىسى.
«بىرىنشىدەن، نازاربايەۆ ۋنيۆەرسيتەتىنىڭ ۇلگىسى بويىنشا وتاندىق جوعارى وقۋ ورىندارىن تولىققاندى اۆتونومدى باسقارۋعا كوشىرۋ جونىندەگى باستالعان رەفورمالاردىڭ اياقتالۋىن تەزىرەك قامتاماسىز ەتۋ كەرەك. ەكىنشىدەن، ۋنيۆەرسيتەتتەردى زەرتتەۋ باعىتىنداعى جوعارى وقۋ ورىندارىنا اينالدىرۋ ءۇشىن مەملەكەتتىك قولداۋدىڭ جۇيەلى شارالارى قاجەت. بۇل رەتتە ا ق ش، گەرمانيا، قىتاي، رەسەي جانە تاعىدا باسقا مەملەكەتتەردىڭ ۇلگىسىندە وتاندىق ۋنيۆەرسيتەتتەردىڭ عىلىمي - تەحنيكالىق الەۋەتىن دامىتۋدىڭ ارنايى باعدارلاماسىن قابىلداۋ وتە ماڭىزدى»، - دەدى سەناتور. ۇشىنشىدەن، ونىڭ اتاپ وتۋىنشە، ۇزدىك الەمدىك تاجىريبەگە سايكەس، ۋنيۆەرسيتەتتەر زاماناۋي باسقارۋ جۇيەسىنە اۋىسۋى كەرەك.
«اتاپ ايتقاندا، جوعارى وقۋ ورىندارىنداعى عىلىمي كەڭەستىڭ القالى باسقارۋ ورگانى رەتىندەگى وكىلەتتىگىن زاڭنامالىق تۇرعىدان ناقتىلاۋ قاجەت. رەكتور تەك اشىق كونكۋرس نەگىزىندە تاعايىندالۋى ءتيىس. سونىمەن قاتار، ءبىزدىڭ رەكتورلارىمىز شەتەلدىك جەتەكشى ۋنيۆەرسيتەتتەردەگىدەي بەلگىلى ءبىر مەرزىمگە عانا سايلانىپ، اۋىسىپ تۇرۋى كەرەك. بۇل جوعارى وقۋ ورنىنىڭ سەرپىندى دامۋىن قامتاماسىز ەتەدى جانە جاس كادرلاردىڭ باسەكەلەستىگىنە جول اشادى»، - دەدى ول.
ءبىلىم جانە عىلىم مينيسترلىگىنىڭ مالىمەتىنە سۇيەنگەن سەناتور 2019 -جىلى مامانداردى دايىنداۋ باعىتتارى بويىنشا مەملەكەتتىك ءبىلىم بەرۋ گرانتىندا وقىعان ۋنيۆەرسيتەت تۇلەكتەرىنىڭ تەك 40-74 پايىزى عانا جۇمىسقا ورنالاسقان.
«ونىڭ وزىندە ولار ءوز ماماندىعىنا سايكەس جۇمىسقا ورنالاستى ما جوق پا، بەلگىسىز. ەگەر جاعداي وزگەرمەسە ءبىز جىلدا بيۋدجەت قاراجاتىنىڭ كەم دەگەندە 10 ميلليارد تەڭگەسىن ءتيىمسىز جۇمساپ وتىرامىز. بۇل دايەكتەر ەلىمىزدىڭ جوعارى ءبىلىم سالاسىنداعى ەلەۋلى كەمشىلىكتەردىڭ بەتىن اشىپ وتىر. بۇل ماسەلە تەك جەكە مەنشىك ۋنيۆەرسيتەتتەردى جابۋمەن شەشىلمەيدى. جالپى ەلىمىزدىڭ ۋنيۆەرسيتەتتىك جۇيەسىن تۇبەگەيلى رەتتەيتىن ۋاقىت كەلدى»، - دەدى اقىلبەك كۇرىشبايەۆ.
