التىنەمەلدە تاعى ءبىر ءىلبىس فوتوتۇزاققا ءتۇسىپ قالدى
بۇل - ءىلبىستىڭ اتالعان ۇلتتىق پاركتەگى ەكىنشى ۆيدەوسى. قىركۇيەك ايىندا فوتوتۇزاققا ءبىر بارىس تۇسكەنىن ەسكەرسەك، ەندى بۇل پاركتە سيرەك كەزدەسەتىن وسىنداي ەكى جانۋار مەكەندەيدى دەۋگە نەگىز بار، دەپ حابارلايدى قازاقپارات.
ەكولوگيا، گەولوگيا جانە تابيعي رەسۋرستار مينيسترلىگىنىڭ مالىمەتىنشە، قىزىل كىتاپقا ەنگەن اڭنىڭ سانى جىلدام ازايىپ كەلەدى. قازاقستاندا 120-130، الەم بويىنشا 7 مىڭداي عانا بارىس بار. عىلىمي دايەكتەردىڭ جوقتىعىنا قاراماستان، التىنەمەل ۇلتتىق پاركىندە بارىس مەكەندەيتىنى قۇجات جۇزىندە دالەلدەنىپ قويدى.
ايتا كەتەيىك، بۇل جولى فوتوتۇزاق باسقا تاۋ شاتقالىنا - شاتقال شۇڭقىرىنىڭ، ياعني بارىس اپانىنىڭ ءدال قاسىنا ورناتىلدى. ۆيدەودان بارىستىڭ قالاي دەمالىپ، پىرىلداعانىن، اينالانى تورۋىلداپ جۇرگەنىن كورۋگە بولادى. قىركۇيەكتەگى بارىس پەن وسى جولعى بارىستىڭ جۇرگەن جەرى ءبىر-بىرىنەن الىس ەكەنىن ەسكەرسەك، بۇلار ەكى بولەك اڭ بولۋى مۇمكىن. بولجامدى ناقتىلاۋ ءۇشىن ىلبىستەردىڭ تەرىسىندەگى داقتار ءجىتى سالىستىرىلادى. سيرەك جانۋارلاردىڭ فوتو، ۆيدەو تۇسىرىلىمدەرى ب ۇ ۇ دامۋ باعدارلاماسى ورناتقان فوتوتۇزاقتار كومەگىمەن الىنىپ وتىر. بارىستىڭ تابىلۋىنا بايلانىستى جانە باسقا دا سيرەك ۇشىراساتىن تيان-شان ايۋى، تۇركىستان مىسىعى، تيان-شان ارقارى، تاس سۋسار، مانۋل جانۋارلارىن زەرتتەۋ ءۇشىن التىنەمەلدە جاڭا عىلىمي-زەرتتەۋ جۇمىسى مەن ۇلتتىق پاركتىڭ جانۋارلار پوپۋلياتسياسىنىڭ جاعدايىن باقىلاۋ عىلىمي باعدارلاماسى باستالادى.
