پروفي-رينگكە العاش شىققان ابىلايحان ءجۇسىپوۆ جەڭىسكە جەتتى

SULEIMEN Promotions كومپانياسى ۇيىمداستىرعان اتىراۋداعى بوكس كەشى اياسىندا 2017-جىلعى ازيا ۆيتسە-چەمپيونى تانزانيادان كەلگەن، 30 دان استام جەكپە-جەك وتكىزگەن تاجىريبەلى مەشاك مۆانكەمۆاعا قارسى شىقتى. ءبىرىنشى ورتا سالماقتاعى جەكپە-جەك جوسپارلانعان بارلىق التى راۋند بويى ءوتتى.

قازاقستاندىق بىلعارى قولعاپ شەبەرى سۋديالاردىڭ شەشىمى بويىنشا جەڭىسكە جەتتى. ابىلايحان ءجۇسىپوۆ - ۇلتتىق قۇراما كوشباسشىلارىنىڭ ءبىرى. ول 69 كەلىگە دەيىنگى سالماق دارەجەسىندە توكيودا وتەتىن 2020-جىلعى وليمپياداعا ليتسەنزيا جەڭىپ الدى.

كوروناۆيرۋس پاندەمياسىنا بايلانىستى اۋەسقوي بوكستاعى جارىستاردا بوس تۇرىپ قالۋىنىڭ سالدارىنان بوكسشى ق ر ۇلتتىق وليمپيادا كوميتەتىنەن كاسىپقوي رينگتە جەكپە-جەك وتكىزۋگە رۇقسات الدى.

Olympic.kz-كە بەرگەن سۇحباتتا قازاقستان قۇراماسىنىڭ باس باپكەرى عالىمبەك كەنجەبايەۆ ابىلايحان ءجۇسىپوۆتىڭ ونەرىن جوعارى باعالادى.

«ءبىزدىڭ بوكسشىلارىمىز ەپيدەميالىق جاعدايعا بايلانىستى يوردانيادا وتكەن توكيو ويىندارىنا ازيالىق بىلىكتىلىكتەن كەيىن ەشقانداي جارىستارعا قاتىسقان جوق. ءبىراق بوكسشىلارعا باسەكەلەستىك تاجىريبە قاجەت. وليمپيادا ويىندارىنا ءبىر جىلدان از ۋاقىت قالدى. ءبىز اۋەسقويلاردىڭ كاسىپقوي رينگتە ونەر كورسەتۋ مۇمكىندىگىنەن شەشىم تاپتىق. بەكزات نۇرداۋلەتوۆ پەن ابىلايحان ءجۇسىپوۆ افريكالىق بوكسشىلارمەن كەزدەستى. ولار فيزيكالىق جاعىنان مىقتى. سونىمەن قاتار، ولاردىڭ ەسەبىندە كاسىبي رينگتە ونەر كورسەتۋ بار. ءجۇسىپوۆ التى راۋند وتكىزىپ، تەحنيكالىق جانە تاكتيكالىق جاعىنان جەڭىسكە جەتتى. مۇنداي كەزدەسۋلەر ول ءۇشىن وتە ماڭىزدى. ول التى راۋندقا شىدايتىنىن كورسەتتى»، - دەپ اتاپ ءوتتى باس باپكەر.

4- قاراشا كۇنى ن. ءابدىروۆ اتىنداعى سپورت سارايىندا جۋرناليستەر ءۇشىن ابىلايحان ءجۇسىپوۆتىڭ اشىق جاتتىعۋى ۇيىمداستىرىلدى.

«مەن قازاقستاندا كاسىبي دەبيۋت وتكىزگەنىمە قۋانىشتىمىن. ءبىز ءۇشىن بۇل جاڭا تاجىريبە بولدى، مەن جاتتىقتىرۋشىلاردىڭ ءۇمىتىن اقتاپ، ولاردىڭ ماعان بەرگەن بارلىق كەڭەستەرىن ورىندادىم. الدىمەن ءبىز قاراعاندىدا دايىندالدىق، سودان كەيىن الماتىدا وقۋ-جاتتىعۋ جيىندارىن وتكىزدىك جانە سول جەردەن اتىراۋعا ۇشىپ كەتتىك. قارسىلاستى زەرتتەپ، قاراپ، ونىڭ توبەلەستەرىن باقىلادىق. وتە جاقسى بوكسشى، توپ-200 قۇرامىنا كىرەدى. ەگەر مۇمكىندىك بولسا، وندا ءارى قاراي دا كاسىپقوي رينگتە ونەر كورسەتەتىن بولامىز. ءبىراق قازىر باستى ماقسات - وليمپيادا ويىندارى. سونداي-اق، 22-29- قاراشا ارالىعىندا شىمكەنتتە وتەتىن قازاقستان چەمپيوناتىنا دايىندالىپ جاتىرمىز»، - دەيدى سپورتشى.

ابىلايحان ءجۇسىپوۆتىڭ جەكە باپكەرى باۋىرجان امانبايەۆ ونى 8 جاسىنان باستاپ جاتتىقتىرادى. تالىمگەر اتاپ وتكەندەي، بوكسشى ەرتە جاستان باستاپ العىر جانە ءتارتىپتى بولدى.

جاتتىقتىرۋشىسى جەكپە-جەكتى تەلەديداردان كورگەن.

«اۋەسقوي بوكس ءۇش راۋندقا، ال كاسىبي التى راۋندقا سوزىلادى. سوندىقتان بوكسشىعا اسىقپاي، مۇقيات قاراپ، سودان كەيىن عانا ارەكەت ەتۋگە كەڭەس بەردىم، - دەيدى باۋىرجان امانبايەۆ.

- ابىلايحان جاقسى ونەر كورسەتتى. ول جارادى! ەرتە جاستان باستاپ وتە العىر. ءارقاشان مەنىڭ ايتقان بارلىق تالاپتى ورىندايدى. ءبارى بىردەن ناتيجە بەرمەدى، ءبىراق ول تالماي ەڭبەك ەتتى. كۇن سايىن ءبىز 2-2,5 ساعاتتان ەكى رەت اينالىسامىز. قازىر ءبىز وليمپيادا ويىندارى مەن قازاقستان چەمپيوناتىنا دايىندالىپ جاتىرمىز. قازاقستاندا 69 كەلى سالماقتا باسەكەلەستىك وتە جوعارى، جانە ءارقاشان سولاي بولعان، قارسىلاستار جەتكىلىكتى، سوندىقتان تەحنيكامەن كوبىرەك جۇمىس ىستەيتىن بولامىز»، - دەيدى باۋىرجان امانبايەۆ.

ابىلايحان ءجۇسىپوۆ 17 جاسىنان بوكستان قازاقستان ۇلتتىق قۇراماسىنا كىردى. 19 دا ول وسى سپورت تۇرىندەگى ەڭ جاس وليمپياداشى بولدى. قازىر ول 23 جاستا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى