وتاندىق مۋلتفيلمدەر ۇلتتىق قۇندىلىقتارىمىزدى اياققا باسىپ جاتىر - ماجىلىسمەن
«ەل بولام دەسەڭ، بەسىگىڭدى تۇزە!» دەگەن ەكەن مۇحتار اۋەزوۆ.
بۇگىندە سونداي بەسىكتىڭ ءبىرى، ياعني تانىم مەن تاربيە قاينارى - مۋلتفيلمدەر ەكەندىگى داۋسىز. كەشەگى بالالار ورىستىڭ «قاپ، بالەم، تۇرا تۇرىن» قىزىقتاعان بولسا، بۇگىنگى بالالار - «ماشا مەن ايۋدى» كورىپ ءماز. ولارمەن وتاندىق انيماتورلارىمىزدىڭ قاي تۋىندىسى باسەكەلەسە الادى؟ راسىندا دا، تەلەديدار مەن ينتەرنەتتە كورسەتىلىپ جۇرگەن وتاندىق مۋلتفيلمدەردىڭ كوركەمدىك دەڭگەيى كوڭىل كونشىتپەيدى.
«الداركوسە»، «ەرتوستىك» سياقتى مۋلتفيلمدەردە حالقىمىزدىڭ اۋىز ادەبيەتىندەگى سۇيىكتى كەيىپكەرلەرىنىڭ وبرازدارى بۇرمالانىپ، ۇلتتىق قۇندىلىقتارىمىز اياققا باسىلعان بولىپ شىقتى. بىرەر مىسال: «الداركوسە» مۋلتفيلمىندە ءبىر كەمپىر ۇيىنە كوڭىلدەسىن كىرگىزىپ الىپ، شالىن ۇرىپ- سوعىپ قۋىپ جىبەرەدى. بۇل ويدان شىعارىلعان، ۇلتىمىزدىڭ داستۇرىنە جات قىلىق ەمەس پە؟ ونى كورگەن بالا قانداي ءتالىم الادى؟
ال «ەرتوستىك» مۋلتفيلمىندە قازاق كىسى ەتىن جەيتىن كاننيبال رەتىندە سيپاتتالعاندىعى جاعاڭدى ۇستاتارلىق جاعداي ەمەس پە؟ ۇلى ويشىل، اقىن اباي تۋرالى ورىس تىلىندەگى 9 سەريالى مۋلتفيلمنىڭ اتاۋى «جاۋىنگەر جولى» ەكەن. سول اتاۋىنا سايكەس اباي بابامىز كوشەدە كەتىپ بارا جاتقان جالعىز قىزعا جابىلعان بۇزاقىلارمەن توبەلەسەدى. ءتىپتى ايۋمەن دە الىسىپ، جەڭىپ شىعادى. بۇل مۋلتفيلمنىڭ يدەيالىق- كوركەمدىك دەڭگەيى، مىنە، وسىنداي»، - دەدى ءماجىلىس دەپۋتاتى.
ونىڭ اتاپ وتۋىنشە، ەلىمىزدىڭ تەلەارنالارىنان كورسەتىلەتىن، باسقا تىلدەردەن قازاق تىلىنە اۋدارىلعان كوپتەگەن مۋلتفيلمنىڭ ساپاسى دا سىن كوتەرمەيدى. ولاردىڭ اۋدارمالارى مەن دىبىستالۋى بالا ساناسى مەن تالعامىنا ساي كەلە بەرمەيدى.
«ساننان ساپا تۋىندايتىنى بەلگىلى. بىزدە شىعارىلاتىن مۋلتفيلمدەر سانى دا ماردىمسىز. مادەنيەت جانە سپورت مينيسترلىگىنىڭ بەرگەن مالىمەتىنە سۇيەنسەك، انيماتسيالىق فيلمدەردىڭ نەگىزگى ءوندىرۋشىسى شاكەن ايمانوۆ اتىنداعى «قازاق فيلم» اكسيونەرلىك قوعامى بازاسىندا قۇرىلعان «انيماتسيالىق كينو» شىعارماشىلىق- وندىرىستىك بىرلەستىگى كەيىنگى 3 جىل ىشىندە جالپى سوماسى 610 ميلليون تەڭگەنى قۇراعان مەملەكەتتىك تاپسىرىس بويىنشا نەبارى 6 مۋلتفيلم شىعارعان. بۇل رەتتە كورشىلەس رەسەي فەدەراتسياسىندا جىل سايىن 100 شاقتى مۋلتفيلم مەملەكەتتىك تاپسىرىس ارقىلى شىعارىلاتىندىعىن ايتقان ءجون»، - دەيدى كارىباي مۇسىرمان.
ءماجىلىس دەپۋتاتىنىڭ ايتۋىنشا، مادەنيەت جانە سپورت مينيسترلىگىنە الداعى جىلى ۇلتتىق فيلمدەر شىعارۋ ءۇشىن رەسپۋبليكالىق بيۋدجەتتەن 1 ميلليارد 159 ميلليون تەنگە ءبولىنىپ وتىر. وسى قارجىنىڭ ەلەۋلى بولىگىن انيماتسيالىق فيلمدەردى شىعارۋعا جۇمساعان ءجون بولار ەدى. وسىعان وراي ول ۇكىمەت باسشىسى ورىنباسارىنىڭ قاراۋىنا بىرنەشە ۇسىنىس جاسادى.
«بىرىنشىدەن، مادەنيەت جانە سپورت مينيسترلىگى قازاقستان انيماتورلار وداعىمەن بىرلەسىپ، انيماتسيالىق فيلمدەردە ۇلتتىق قۇندىلىقتاردى ناسيحاتتاۋ جانە ولاردى بۇرمالاۋدىڭ الدىن الۋ ماسەلەسىن قاراعانى ءجون.
ەكىنشىدەن، وتاندىق انيماتسيالىق فيلمدەر سانىن كوبەيتۋ ماقساتىندا ولاردى شىعارۋعا ارنالعان مەملەكەتتىك تاپسىرىس كولەمىن ارتتىرۋ ماسەلەسىن قاراۋ قاجەت.
ۇشىنشىدەن، اقپارات جانە قوعامدىق دامۋ مينيسترلىگى انيماتسيالىق فيلمدەر شىعاراتىن جانە ولاردى كورسەتەتىن تەلەارنالاردا شىعارىلعان جانە باسقا تىلدەردەن قازاق تىلىنە اۋدارىلعان انيماتسيالىق فيلمدەردىڭ كوركەمدىك دەڭگەيىن جانە بالا تاربيەسىنە اسەرىن انىقتايتىن كوركەمدىك كەڭەستەر قۇرۋ جانە ولاردىڭ قۇرامىندا ساراپشىلار رەتىندە تاجىريبەلى پەداگوگ، پسيحولوگ، قازاق ءتىلى ماماندارى مىندەتتى تۇردە بولۋى ماسەلەسىن قاراسىن.
تورتىنشىدەن، وتاندىق انيماتسيا ماماندارىنىڭ بىلىكتىلىگىن جەتىلدىرۋ ءۇشىن ولاردى شەتەلدەردەگى جەتەكشى انيماتسيالىق ستۋديالاردا تاعىلىمدامادان وتكىزۋ قاجەت.
بەسىنشىدەن، شاكەن ايمانوۆ اتىنداعى «قازاق فيلم» اكسيونەرلىك قوعامىن انيماتسيالىق فيلمدەر وندىرىسىنە قاجەتتى وسى زامانعى تەحنيكالىق جابدىقتارمەن جابدىقتاۋ ماسەلەسىن قاراۋ كەرەك»، - دەيدى كارىباي مۇسىرمان.
