اسقار مامين ءبىر اي ىشىندە بارلىق وڭىردە گاز-تەحنيكالىق ينسپەكتسيانى قۇرۋدى جۇكتەدى
«گاز جانە گازبەن جابدىقتاۋ تۋرالى» زاڭعا سايكەس اكىمدىكتەر گاز-تەحنيكالىق ينسپەكتسيا قۇرىپ، بۇكىل گاز جابدىعىن تەكسەرىپ تۇرۋى كەرەك. الايدا بۇل جۇمىس استانادا، الماتىدا، اقمولا وبلىسى مەن قوستاناي وبلىسىندا عانا اتقارىلدى. باسقا بارلىق وڭىرلەردىڭ اكىمدىكتەرىنە ءبىر اي ىشىندە گاز-تەحنيكالىق ينسپەكتسيا قۇرىپ، ءتيىستى باقىلاۋدى قامتاماسىز ەتۋدى تاپسىرامىن»، - دەدى پرەمەر-مينيستر.
سونىمەن قاتار ۇكىمەت باسشىسى جاۋاپتى ۆەدومستۆولار تۇرعىندار اراسىندا ءورت قاۋىپسىزدىگىنە قاتىستى ءتۇسىندىرۋ شارالارىن كۇشەيتۋى كەرەكتىگىن اتاپ ءوتتى.
«توتەنشە جاعدايلار مينيسترلىگى اكىمدىكتەرمەن بىرلەسىپ، جىلۋ بەرۋ ماۋسىمىندا ءورت قاۋىپسىزدىگى ماسەلەسى بويىنشا حالىق اراسىندا الدىن الۋ جۇمىستارىن كۇشەيتسىن. اقپارات مينيسترلىگى جاردەم كورسەتسىن»، - دەپ اتاپ ءوتتى اسقار مامين.
بۇدان بۇرىن حابارلانعانداي، ۇكىمەت وتىرىسىندا ءورت قاۋىپسىزدىگى ماسەلەسىن تالقىلاۋ كەزىندە پرەمەر-مينيستر 2021-جىلدان باستاپ كەلەسى ءۇش جىلدىق كەزەڭگە ارنالعان ماتەريالدىق-تەحنيكالىق جاراقتاندىرۋ تۋرالى جاڭا جول كارتاسىن ازىرلەپ، بەكىتۋدى تاپسىردى.
