شولپان كارينوۆا جاڭا «الىپپەنى» وقىتۋ كەزەڭدەرى تۋرالى ايتتى

«الىپپە» احمەت بايتۇرسىن ۇلىنىڭ ادىستەمەسى نەگىزىندە دايىندالۋدا. جۇمىس توبىنداعى بارلىق عالىمدار مەن مۇعالىمدەر تاراپىنان بۇل تولىق قولداۋ تاپتى. ويتكەنى بۇل جۇيە وقۋشىلاردىڭ بىلىمىنە قاتىستى ناعىز تالاپتاردى قامتىپ وتىرعاندىعى، ونىڭ ىشىندە ارىپتەر مەن دىبىستاردىڭ رەتتىلىگى ەسكەرىلىپ پايدالانىلعانى اتالىپ ءوتتى»، - دەدى ۆيتسە-مينيستر ورتالىق كوممۋنيكاتسيالار قىزمەتىندە.

ونىڭ سوزىنە قاراعاندا، «الىپپەنى» وقىتۋدىڭ ءۇش كەزەڭى قامتىلعان. «وسى ورايدا «الىپپەگە» دەيىنگى كەزەڭ، «الىپپە» كەزەڭ، سونداي-اق «الىپپەدەن» كەيىنگى كەزەڭ ەسكەرىلگەن. وسىنىڭ ەكى كەزەڭى «الىپپە» وقۋلىعى ارقىلى ىسكە اسىرىلادى. ال كەيىنگى كەزەڭ مەكتەپتەردە «انا ءتىلى» وقۋلىعى بويىنشا جۇرگىزىلەدى»، - دەدى ش. كارينوۆا.

بۇل تۇرعىدا ول اتا-انالاردىڭ ەسكەرتۋلەرى قارالىپ، قازىرگى دايىندالىپ جاتقان وقۋلىقتا بالانىڭ فيزيلوگيالىق جاس ەرەكشەلىگى ەسكەرىلىپ جازىلىپ جاتقانىن اتاپ ءوتتى. «الىپپە» كەزەڭى وتە ماڭىزدى، وندا ءارىپ، دىبىس پەن بۋىنداردى ۇيرەتۋ ىسكە اسىرىلادى. بۇل كەزەڭگە باسا نازار اۋدارىلعان. ودان كەيىن جەلتوقسان ايىندا «الىپپەمەن» قوشتاسۋ جۇرگىزىلەتىن، قازىرگى پرينسيپ تە وسىعان وراي جاسالادى»، - دەدى ۆيتسە-مينيستر.

بۇدان بۇرىن حابارلانعانداي، «الىپپەنى» ەنگىزۋ 2021-2022 -جىلعا جوسپارلانعان. بيىل تامىز ايىندا ق ر ءبىلىم جانە عىلىم ءمينيسترى اسحات ايماعامبەتوۆ وزگەرىستىڭ اياسىندا مەكتەپ باعدارلاماسىنا سايكەس، 1-سىنىپتارعا 1-2-توقسان «الىپپە»، 3-4-توقسان «انا ءتىلى» ەنگىزىلەتىنىن ايتقان ەدى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى