ەرماحان ىبىرايىموۆ: ءوزىمىز ءۇشىن عانا ەمەس، وزگە ءۇشىن دە جاۋاپتى ەكەنىمىزدى ۇمىتپايىق

«قۇدايعا شۇكىر، ەلدەگى ىندەتتىڭ بەتى قايتتى دەپ ۇمىتتەنىپ ءجۇر ەدىك، ايتسە دە كەيىنگى كەزدە اتى جامان اۋرۋدى جۇقتىرىپ جاتقانداردىڭ سانى قايتادان كوبەيىپ بارا جاتىر ەكەن. قايتا قورقا باستادىق. الەمدەگى مەملەكەتتەر دە قايتادان شەكارالارىن تارس جاۋىپ، ەتەك-جەڭىن جيىپ جاتىر. ەندەشە ءبىز دە ساقتانايىق. حالىقتىڭ ءبىر وكىلىمىز. كوپتىڭ ءبىرىمىز. ەل ىشىندە كورىپ- ءبىلىپ ءجۇرمىز - الەۋمەتتىك قاشىقتى دا، ماسكا رەجيمىن دە ساقتامايتىندار كوپ ەكەن. ءوز باسىم سوندايدى بايقاسام، ونىڭ دۇرىس ەمەستىگىن ايتىپ ءجۇرمىن. تالاپتى ساقتاماعان جاستاردى كورسەم توقتاتىپ تۇرىپ، «ماسكالارىڭ قايدا؟ نەگە كيمەيسىڭدەر؟ قازىر ۇيگە باراسىڭدار، ولاردىڭ جاعدايىن ويلايسىڭدار ما؟» دەپ كەڭەسىمدى دە ايتامىن. «ءبىر قۇمالاق ءبىر قارىن مايدى شىرىتەدى» دەگەن ءسوز بار. ءوزىمىز ءۇشىن عانا ەمەس، وزگە ءۇشىن دە جاۋاپتى ەكەنىمىزدى ۇمىتپايىق»، - دەيدى ەرماحان ىبىرايىموۆ.

وليمپيادا چەمپيونى حالىقتى دارىگەرلەردىڭ كەڭەسىن تىڭداۋعا شاقىردى.

ەسكە سالا كەتسەك وسىدان بىرنەشە كۇن بۇرىن ق ر پرەزيدەنتى قاسىم-جومارت توقايەۆ قازاقستاندىقتاردى كارانتين شارالارىن ساقتاۋعا ۇندەگەن بولاتىن.

«كوپتەگەن شەت ەلدەردەگى كوروناۆيرۋس ىندەتىنىڭ تارالۋ جاعدايى الاڭداتارلىق. بارلىق جەردە قاتاڭ شارالار، ونىڭ ىشىندە، لوكداۋن ءتارتىبى قايتا قابىلدانىپ جاتىر. قازاقستاندىقتاردى دەنساۋلىق ساقتاۋ مينيسترلىگىنىڭ ۇسىنىمدارىن ۇستانىپ، كارانتين شارالارىن ساقتاۋعا شاقىرامىن»، - دەپ جازدى پرەزيدەنت Twitter-دە.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى