دانيار بيعايداروۆ پارانى كىمدەر كوپ بەرەتىنىن ايتتى
بۇل تۋرالى ق ر سىبايلاس جەمقورلىققا قارسى ءىس- قيمىل اگەنتتىگى 1 -دەپارتامەنتىنىڭ اسا ماڭىزدى ىستەر جونىندەگى تەرگەۋشىسى دانيار بيعايداروۆ ءمالىم ەتتى، دەپ حابارلايدى قازاقپارات.
ونىڭ سوزىنە قاراعاندا، الەۋمەتتىك جاۋاپكەرشىلىكتىڭ جانە سىبايلاس جەمقورلىقتىڭ سالدارىنان قوعامدا بولىپ جاتقان زارداپتاردىڭ جۇگى اۋىر. ونىڭ زاردابى تەك جەمقوردىڭ وزىنە ءتيىپ قويماي، سونىمەن بىرگە ونىڭ ۇرپاعىنا، جاقىن تۋىستارىنا دا قارا كۇيە بولىپ جاعىلادى.
«تالداۋ كورسەتكەندەي، كوپ جاعدايدا پارا بەرۋشىلەر قاتارىن جەكە كومپانيالاردىڭ وكىلدەرى باستاپ تۇرادى. ولار لاۋازىمدى تۇلعالاردى پاراعا ساتىپ الۋ ارقىلى كاسىپكەرلىك قىزمەتتى قولايلى ىسكە اسىرۋ (كەدەندىك راسىمدەردى جەڭىلدەتۋ جانە جەدەلدەتۋ، ليتسەنزيالار، سەرتيفيكاتتار، رۇقساتتار الۋ جانە ت. ب. )، ورىندالعان جۇمىستاردىڭ اكتىلەرىنە كەدەرگىسىز قول قويۋ، مەملەكەتتىك ساتىپ الۋ شارتتارى بويىنشا اقشا اۋدارۋ ماسەلەلەرىن شەشەدى. كاسىپكەرلەرگە پارا بەرەر الدىندا ويلانۋ كەرەكتىگىن ەسكە سالىپ، ەسكەرتكىم كەلەدى. سونىڭ سالدارىنان ولار بەلگىلى ءبىر قىزمەتپەن اينالىسۋ قۇقىعىنان، ليتسەنزيالاردان، سەرتيفيكاتتاردان، رۇقساتتاردان ايىرىلۋى جانە مەملەكەتتىك ساتىپ الۋعا جوسىقسىز قاتىسۋشىلاردىڭ تىزىلىمىنە ەنگىزىلۋى مۇمكىن»، - دەدى دانيار بيعايداروۆ.
مۇنداي جاعدايدا بيزنەسمەندەر تابىس كوزىنەن ايىرىلىپ قانا قويماي، قىزمەتكەرلەرىن جۇمىسسىز قالدىرادى.
«حالىقارالىق تاجىريبەدە زاڭنامالىق دەڭگەيدە بەكىتىلگەن بيزنەستى جۇرگىزۋدىڭ ارنايى ستاندارتتارى مەن ەتيكاسى قولدانىلادى. ەگەر ولار ورىندالماسا، ارام قولدى كاسىپكەرلەرگە ءتۇرلى سانكتسيالار قولدانىلادى. پارا بەرۋ سياقتى قىلمىس قۇرامىنىڭ قوعامدىق قاۋىپتىلىگىن پارا الۋمەن سالىستىرۋعا بولاتىندىعىن اتاپ وتكەن ءجون. ياعني، «پارا بەرۋشى دە، پارا الۋشى دا - قىلمىسكەر ەكەنى حاق». سوندىقتان مۇنداي ادامداردىڭ ءىس- ارەكەتتەرى پارا الۋشىنىڭ ءىس- ارەكەتىنەن كەم ەمەس قوعامدىق قاۋىپكە يە»، - دەدى اگەنتتىك وكىلى.
