شاعىن اۋىلداردا وتاندىق راديونىڭ تارالۋ دەڭگەيى تومەن

بۇل ق ر اقپارات جانە قوعامدىق دامۋ ءمينيسترى ايدا بالايەۆانىڭ ءماجىلىس دەپۋتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.

«قازىرگى ۋاقىتتا مينيسترلىك سيفرلىق ەفيرلىك تەلەحابار تاراتۋ جوباسىن جۇزەگە اسىرۋ مەرزىمىن 2022 -جىلعا دەيىن ۇزارتۋ جانە ودان ءارى قارجىلاندىرۋ ماقساتىندا قارجى- ەكونوميكالىق نەگىزدەمەنى تۇزەتۋ بويىنشا جۇمىس جۇرگىزۋدە. سونىمەن قاتار، حالىقتى مەملەكەتتىك راديوحابار تاراتۋمەن قامتۋ ايماعىن كەڭەيتۋ ماقساتىندا 2018-2020 -جىلدار ارالىعىندا مينيسترلىك تاراپىنان راديوجيىلىكتەردى ءبولۋ بويىنشا كونكۋرستار وتكىزىلدى. ناتيجەسىندە وسى كەزەڭدە 17 راديوتاراتقىش ورناتىلدى. بۇل شامامەن 450 مىڭ ادام سانى بار 170 ەلدى مەكەندە (الماتى، شىعىس قازاقستان، قوستاناي، سولتۇستىك قازاقستان جانە تۇركىستان وبلىستارى) راديو قابىلداۋدى قامتاماسىز ەتۋگە مۇمكىندىك بەردى»، - دەدى مينيستر.

ونىڭ اتاپ وتۋىنشە، قازىرگى جاعدايدا قولدانىستاعى مەملەكەتتىك راديوحابار تاراتۋ جەلىسى حالىقتىڭ 88,7 پايىزىن قازاق راديوسىمەن، 64 پايىزىن شالقار راديوسىمەن قامتاماسىز ەتىپ وتىر.

«دەگەنمەن، شاعىن اۋىلدىق ەلدى مەكەندەردە وتاندىق راديونىڭ تارالۋ دەڭگەيى تومەن ەكەنىن اتاپ ءوتۋ قاجەت. ماسەلەن، «قازاق» راديوسى باعدارلاماسىمەن اۋىلدىق ەلدى مەكەندەردىڭ 48 پايىزى، «شالقار» راديوسى باعدارلاماسىمەن ەلدى مەكەندەردىڭ 70 پايىزدان استامى قامتىلماعان. بۇل رەتتە شەكارا ماڭىنداعى اۋداندار حالقىنىڭ كەمىندە 95 پايىز دەڭگەيىندە مەملەكەتتىك راديوحابار تاراتۋمەن قامتۋ ءۇشىن ەلەۋلى قارجىلاي شىعىندار تالاپ ەتىلەدى. وسىعان وراي، حالىقتى مەملەكەتتىك راديوتاراتۋمەن قامتۋ ايماعىن كەڭەيتۋ ماقساتىندا ودان ءارى جۇيەلى جۇمىس جۇرگىزۋ ءۇشىن مينيسترلىك تاراپىنان راديوتاراتۋدى كەزەڭ- كەزەڭىمەن دامىتۋدىڭ جول كارتاسىن ازىرلەۋ جوسپارلانۋدا»، - دەدى ايدا بالايەۆا.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى