بەيادەپ قىلىق كورسەتۋ جانە فونوگراممانى ەسكەرتۋسىز قولدانۋ زاڭمەن قاداعالانادى
«زاڭ جوباسىنا سايكەس مۋزىكالىق تۋىندىلاردى ورىنداۋشىلاردىڭ فونوگراممانى قولدانۋى تۋرالى ەرەجەلەر ءسوز بولدى. قۇجاتتا سونداي-اق، مەملەكەت قاۋىپسىزدىگىنە نۇقسان كەلتىرەتىن الەۋمەتتىك، ناسىلدىك، ۇلتتىق، ءدىني، تەكتىك-توپتىق جانە رۋلىق استامشىلىقتى، قاتىگەزدىك پەن زورلىق زومبىلىقتى ناسيحاتتاۋعا نەمەسە ۇگىتتەۋگە باعىتتالعان اقپارات اۋقىمىنا تىيىم سالۋ ەرەجەلەرى جازىلعان. بۇل كوپشىلىك قاتىسۋىمەن وتەتىن ءىس شارالارعا قاتىستى»، - دەلىنگەن سەنات باسپا ءسوز قىزمەتىنىڭ مالىمەتىندە.
زاڭ جوباسىنا ويىن-ساۋىق مادەني- بۇقارالىق شارالاردا مۋزىكالىق تۋىندىلاردى ورىنداۋ كەزىندە فونوگراممالاردىڭ قولدانىلۋى تۋرالى كورەرمەنگە حابارلاۋ جونىندە مىندەتتەر ەنگىزىلدى.
سەناتورلار قازاقستان حالقىنىڭ مادەني مۇراسىن ساقتاۋدى قاراستىراتىن قازاقستان ۇلتتىق ەلەكتروندىق كىتاپحاناسىن قۇرۋ ماسەلەسىنە دە ەرەكشە نازار اۋداردى.
اۆتور: رۋسلان عابباسوۆ
