سولتۇستىك قازاقستان وبلىسىندا كارانتين كۇشەيتىلدى

سولتۇستىك قازاقستان وبلىسىندا باس سانيتاريالىق دارىگەردىڭ جاڭا قاۋلىسى شىقتى. كوروناۆيرۋس ينفەكسياسىنا شالدىققاندار سانىنىڭ ارتۋىنا بايلانىستى وڭىردە كارانتين تالاپتارى 16-قازاننان باستاپ قاتاڭداتىلماق. وسىعان وراي بۇگىن پەتروپاۆلدا بريفينگ ءوتتى.

س ق و-نىڭ باس سانيتاريالىق دارىگەرى سەرىكباي قاسماقاسوۆتىڭ جاڭا قاۋلىسىنا سايكەس ساۋدا، ويىن-ساۋىق ورتالىقتارىنىڭ، ساۋدا ۇيلەرىنىڭ، ازىق-تۇلىك جانە ازىق-تۇلىك ەمەس دۇكەندەردىڭ، مونشالار مەن ساۋنالاردىڭ جۇمىسى ساعات 22.00 گە دەيىن قىسقارادى.

قوعامدىق تاماقتانۋ ورىندارىندا كەلۋشىلەر سانى 50 دەن 30 عا دەيىن قىسقارىپ، ساعات 22.00 گە دەيىن عانا جۇمىس ىستەيدى. ال مەرەكە جانە دەمالىس كۇندەرى قوعامدىق تاماقتانۋ نىساندارىنان تاماقتى تەك ساتىپ الۋعا نەمەسە تاپسىرىسپەن العىزۋعا عانا بولادى. دەمالىس جانە مەرەكە كۇندەرى ۋاقىتشا جابىق جايما بازارلار، ازىق- تۇلىك ەمەس تاۋارلار ساتاتىن جابىق بازارلار، سپورت نىساندارى، فيتنەس، ترەناجەر زالدارى، باسسەيندەر، ءبىلىم بەرۋ ورتالىقتارى، ۇيىرمەلەر، تۋريزم نىساندارى مەن ساۋدا ويىن-ساۋىق ورتالىقتارى، اۋماعى 500 شارشى مەتردەن اساتىن ازىق- تۇلىك ەمەس تاۋارلار دۇكەندەر جۇمىس ىستەمەيدى.

پەتروپاۆلدا دەمالىس كۇندەرى قوعامدىق كولىكتەردىڭ جۇمىسى توقتاپ، ساياباقتارعا، باقتارعا، وزەن- كولدەردىڭ جاعاسىنا بارىپ دەمالۋعا تىيىم سالىندى. سونداي-اق شتاتتا 30 دان ارتىق ادام بولعان جاعدايدا، %50 كەم ەمەس قىزمەتكەرلەر قاشىقتان جۇمىس ىستەۋلەرى ءتيىس. س ق و تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسپا ءسوز قىزمەتىنىڭ مالىمەتىنشە، وڭىردە ناۋرىز ايىنان بەرى ك ۆ ي جۇقتىرۋدىڭ 4257 جاعدايى تىركەلدى. 24 ادام قايتىس بولدى.

قازىر ءوڭىر قاۋىپتى ينفەكسيانى جۇقتىرۋدان ءبىرىنشى ورىندا تۇر. وتكەن تاۋلىكتە س ق و- دا جاڭادان 14 ناۋقاس تىركەلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى