قازاقستاندا ۇشاق بيلەتى ارزاندادى

2020 -جىلدىڭ قاڭتار- قىركۇيەگىندە ەلىمىزدىڭ اۋە كومپانيالارى 3,8 ميلليون جولاۋشى تاسىمالدادى. بۇل - وتكەن جىلدىڭ 9 ايىنداعى كورسەتكىشتەن 40,4 پايىز از.

قىركۇيەكتە اۋە تاسىمالى 608,5 مىڭ جولاۋشى بولدى. بۇل وسى جىلدىڭ تامىزىمەن سالىستىرعاندا 13,1 پايىز كوپ بولعانىمەن وتكەن جىلدىڭ قىركۇيەگىنە قاراعاندا 19,7 پايىز كەم. 9 ايداعى جولاۋشىلار اينالىمى 5,9 ميلليارد جولاۋشى شاقىرىمدى قۇراپ، جىل ىشىندە 2,2 ەسە قىسقاردى. قىركۇيەكتە جولاۋشىلار اينالىمى 941,8 ميلليون جولاۋشى شاقىرىم بولدى. بۇل كورسەتكىش تامىزعا قاراعاندا 46,5 پايىز جوعارى بولعانىمەن وتكەن جىلدىڭ قىركۇيەگىمەن سالىستىرعاندا 35,5 پايىزعا تومەن.

وسى جىلدىڭ 9 ايىنىڭ قورىتىندىسىندا اۋە كەمەسىمەن جۇك تاسىمالى 15,5 مىڭ توننانى قۇراپ، وتكەن جىلمەن سالىستىرعاندا 18,7 پايىزعا كەمىدى. قىركۇيەكتە 2,5 مىڭ توننا جۇك تاسىمالداندى. بۇل تامىزداعى كورسەتكىشتەن 18,2 پايىزعا از. سونىمەن قاتار ەسەپتى كەزەڭدە اۋە كومپانيالارىنىڭ تابىسى 54,3 پايىزعا، 135,8 ميلليارد تەڭگەگە دەيىن قىسقاردى. مۇنداي تەرىس ديناميكا سوڭعى 4 جىلدا العاش رەت بايقالادى.

2020 -جىلدىڭ قىركۇيەگىندە جولاۋشىلار اۋە كولىگى قىزمەتتەرىنىڭ قۇنى وتكەن جىلدىڭ قىركۇيەگىمەن سالىستىرعاندا 8,7 پايىزعا ارزاندادى. ەلىمىزدىڭ 17 ءوڭىرى ىشىندە باتىس قازاقستان (36,1 پايىز)، اتىراۋ (13,1)، قاراعاندى (5,6) جانە قوستاناي (4,5) وبلىستارىندا عانا باعا ءوسىمى تىركەلدى. اقمولا، الماتى، سولتۇستىك قازاقستان جانە تۇركىستان وبلىستارىندا باعا تۇراقتى. ەلوردادا باعا تومەندەۋى 36,5، شىمكەنتتە 36,3 جانە ماڭعىستاۋ وبلىسىندا 24,7 پايىزدى قۇرادى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى