سوزاق اۋدانىندا تۇيە شارۋاشىلىعىن دامىتۋ جاندانىپ كەلەدى
وبلىس باسشىسى ويسىل قارا تۇقىمىن كوبەيتۋ ارقىلى وزگە وڭىرلەرمەن باسەكەلەس بولۋعا قاۋقارلى اۋدانعا وسى كاسىپتى مىقتاپ قولعا الۋدى تاپسىرعان بولاتىن. وسى ماقساتتا تۇيە تۇلىگىن اسىلداندىرۋعا 2000-عا جۋىق تۇيە انالىعى ساتىپ الىندى. ونىڭ جارتىسى جەڭىلدەتىلگەن نەسيە الۋ ارقىلى، قالعانى ازاماتتاردىڭ ءوز قاراجاتى ەسەبىنەن جۇزەگە اسىرىلعان.
ايماق باسشىسى ءومىرزاق شوكەيەۆ اۋدانعا ارنايى جۇمىس ساپارى بارىسىندا تۇيە شارۋاشىلىعىمەن اينالىساتىن ءبىرقاتار شارۋا قوجالىقتارىنىڭ جاي- كۇيىمەن تانىستى. سوزاق اۋدانىندا تۇيە شارۋاشىلىعىنىڭ الەۋەتى جوعارى. ماسەلەن، ءوڭىر باسشىسى ايالداعان شولاققورعان اۋىلىندا تۇيە شارۋاشىلىعىن وركەندەتىپ وتىرعان «باعدات» شارۋا قوجالىعىندا 350 باس تۇيە بار. شولگە شىدامدى ءتورت تۇلىكتەن كوكتەم ايلارىندا 256 توننا تۇيە ءسۇتى «Golden Саmеl Group LTD» ج ش س زاۋىتىنا وتكىزىلگەن.
ءىرى مال باسىن اسىلداندىرۋمەن اينالىساتىن «قانجاربەك» شارۋا قوجالىعىندا 110 باس ءمۇيىزدى ءىرى قارا، 1150 باس ۋاق مال مەن جۇزگە جۋىق جىلقى بار.
مال شارۋاشىلىعىن دامىتۋدا سوزاق اۋدانى مەجەلى تابىستارعا قول جەتكىزۋدە. اتاپ ايتقاندا، اۋداندا 40 مىڭعا جۋىق ءمۇيىزدى ءىرى قارا، 341471 باس قوي- ەشكى مالى مەن 14 مىڭعا جۋىق تۇيە، 25 مىڭنان استام قۇس وسىرىلۋدە. بىلتىرعى جىلدىڭ وسى كەزەڭىمەن سالىستىرعاندا اۋىل شارۋاشىلىعى ونىمدەرىن ءوندىرۋ كولەمى ەداۋىر وسكەنى بايقالادى.
ءومىرزاق ەستاي ۇلىنىڭ تاپسىرماسىمەن تۇركىستان وبلىسىندا تۇيە شارۋاشىلىعىن دامىتۋدىڭ 2020-2022 -جىلدارعا ارنالعان كەشەندى ءىس- شارا جوسپارى جاسالىندى. جوسپارعا سايكەس، ارىس، كەنتاۋ قالالارى مەن وتىرار، ورداباسى، سوزاق، شاردارا اۋداندارىندا بيىلعا قوسىمشا 3962 ىنگەن ساتىپ الىنىپ، سونىڭ ناتيجەسىندە وندىرىلەتىن ءسۇتتىڭ كولەمىن 14250 تونناعا ياعني % 15- عا ارتتىرۋ جوسپارلانعان.
