پەتروپاۆلدا قوعامدىق كولىكتىڭ ەكى باعىتى قىسقاردى

پەتروپاۆل قالالىق اكىمدىگى باسپا ءسوز قىزمەتىنىڭ مالىمەتىنشە، وبلىس ورتالىعىندا قوعامدىق كولىك جۇمىسىن وڭتايلاندىرۋعا قاتىستى ءبىرقاتار جۇمىستار اتقارىلىپ جاتىر. 1-جەلتوقساننان باستاپ اۆتوبۋستارعا ەلەكتروندى بيلەت جۇيەسى ەنگىزىلمەك.

«بۇل جۇمىس جولاۋشى تاسىمالداۋشىلاردىڭ جۇمىسىن باقىلاۋدا ۇستاۋ ماقساتىندا جۇرگىزىلىپ جاتىر. وسىلايشا ولاردىڭ ناقتى تابىسى بەلگىلى بولادى جانە بيۋدجەتكە تۇسەتىن قارجى كولەمى ۇلعايماق. قوعامدىق كولىك بيلەتىنىڭ باعاسى وزگەرىسسىز قالادى. ەرەسەكتەرگە - 80 تەڭگە، مەكتەپ وقۋشىلارىنا - 40 تەڭگە. ال قولما-قول ەسەپ ايىرىسقان جاعدايدا جولاۋشىلار 130 تەڭگە تولەمەك»، - دەيدى پەتروپاۆل قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ باسشىسى باقىت ءىلياسوۆ.

ەلەكتروندى بيلەتتەر ازىرگە ساتىلىمعا تۇسكەن جوق، جوسپار بويىنشا وسى اي سوڭىندا 400 تەڭگەدەن ساۋداعا شىقپاق. جولاۋشى تاسىمالىنىڭ ساپاسىن ارتتىرۋ ءۇشىن جىل سوڭىنا دەيىن پەتروپاۆلعا جاڭا اۆتوبۋستار جەتكىزىلمەك. سونداي-اق قوعامدىق كولىك جۇمىسىن وڭتايلاندىرۋ ماقساتىندا بىرنەشە باعىتتى قىسقارتۋ جوسپارلانعان.

«№ 19 جانە № 4م باعىتتاعى اۆتوبۋستار الىنادى. كاسىپورىن باسشىسىمەن ولاردى قىسقارتۋ جايىندا بۇرىننان ءسوز قوزعالىپ كەلەدى. ويتكەنى بۇل باعىتتاردا جۇرەتىن جولاۋشى از، سول سەبەپتى اۆتوبۋس شىعارۋ ءتيىمسىز. جاقىندا ولار بىزگە رەسمي حات جولداپ، 18-قازاننان باستاپ وسى ەكى باعىت بويىنشا اۆتوبۋستاردىڭ جولعا شىقپايتىنىن ەسكەرتتى»، - دەيدى باقىت ءىلياسوۆ.

اۆتور: اقەركە داۋرەنبەك قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى