جامبىل وبلىسىندا بۇزاقىلار پوليتسەيدىڭ قىزمەتتىك كولىگىن ايداپ كەتتى
وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، شۋ اۋداندىق پوليتسيا ءبولىمىنىڭ قىزمەتكەرى كەشكى ساپتىق جيىننان كەيىن قىزمەتتىك اۆتوكولىگىمەن ۇيىنە قايتىپ كەلە جاتقان كەزدە جول ۇستىندە تۇرعان ماس بۇزاقىلاردى بايقاعان.
«پوليتسيا قىزمەتكەرى كولىك جولىنىڭ ۇستىندە تۇرعان، ماساڭ كۇيدە بولعان جانە ءبىر- بىرىنە قاتىستى اگرەسسيۆتى ارەكەت ەتكەن ءۇش بەلگىسىز ادامدى بايقاعان. جانجالدى رەتتەۋگە جانە زاڭسىز ارەكەتتەردى، سونىڭ ىشىندە جول- كولىك وقيعاسىنىڭ الدىن الۋعا تىرىسقان پوليتسەي بەلگىسىز ادامداردان بۇزاقىلىق ارەكەتتەرىن توقتاتۋلارىن جانە جولدىڭ ءجۇرىس بولىگىنەن ارى تۇرۋىن تالاپ ەتكەن. الايدا، ايتىلعان ەسكەرتۋگە قۇلاق اسپاعان قۇقىق بۇزۋشىلاردىڭ ەكەۋى ءوز نارازىلىقتارىن ءبىلدىرىپ، قارسى جاۋاپ رەتىندە پوليتسيا قىزمەتكەرىن بالاعاتتاعان. ارتىنشا، وعان قاتىستى كۇش قولدانۋعا تىرىسقان»، - دەلىنگەن ۆەدومستۆو حابارلاماسىندا.
ءتارتىپ ساقشىسى بۇزاقىلارعا قارسى كۇش قولدانۋعا ءماجبۇر بولىپ، ولاردىڭ ءبىرىن ۇستاعان. سول كەزدە ەكىنشىسى پوليتسەيدىڭ قىزمەتتىك كولىگىنە ءمىنىپ، قاشىپ كەتۋگە تىرىسقان. الايدا، 10 مەتر وتپەي، اۆتوكولىكتى سول ماڭداعى ايالداماعا سوققان. اتالعان دەرەككە قاتىستى ق ر ق ك- ءنىڭ 380-بابى 1-بولىگى بويىنشا سوتقا دەيىنگى تەرگەۋ امالدارى باستالدى.
