سوورونباي جەەنبەكوۆ ەل پارلامەنتىنە ۇكىمەتتى بەكىتۋ تۋرالى قاۋلىنى قايتاردى
بۇل تۋرالى ق ر پرەزيدەنت اپپاراتىنىڭ اقپاراتتىق ساياسات ءبولىمى ءمالىم ەتتى، دەپ حابارلايدى قازاقپارات كابار اگەنتتىگىنە سىلتەمە جاساپ.
جوگوركۋ كەنەش قاۋلىسىنىڭ كوشىرمەلەرى پرەزيدەنت اپپاراتىنا 2020 -جىلدىڭ 12 قازانىندا كەلىپ تۇسكەن. ق ر كونستيتۋتسياسىنىڭ 84-بابى 5-تارماعىنا سايكەس پرەزيدەنت ءۇش كۇن ىشىندە پرەمەر- مينيستر مەن ۇكىمەتتىڭ باسقا دا مۇشەلەرىن تاعايىنداۋ تۋرالى جارلىق شىعارادى. ايتا كەتەيىك، جوگوركۋ كەنەشتىڭ بۇل شەشىمى قوعام اراسىندا قىزۋ تالقىعا ءتۇسىپ، قابىلدانعان شەشىمنىڭ زاڭدى ەكەندىگىنە كۇمان كەلتىرۋشىلەر كوپ. كونستيتۋتسيانىڭ 77-بابى 4-تارماعىنا سايكەس جوگوركۋ كەنەش دەپۋتاتتارىنىڭ جارتىسىنان كوبى قاتىسقان جاعدايدا جوگوركۋ كەنەش وتىرىسى زاڭدى دەپ ەسەپتەلەدى.
«جوگوركۋ كەنەشتىڭ رەگلامەنتى تۋرالى» زاڭنىڭ 82-بابىنا سايكەس جوگوركۋ كەنەشتىڭ جانە ونىڭ ورگاندارىنىڭ وتىرىستارى كۆورۋم بولعان كەزدە زاڭدى، ال قابىلدانعان شەشىمدەر - زاڭدى كۇشى بار دەپ ەسەپتەلەدى. جوگوركۋ كەنەش، كوميتەتتەر، كوميسسيا وتىرىستارىنىڭ كۆورۋمى جوگوركۋ كەنەش دەپۋتاتتارى، كوميتەتتەر، كوميسسيالار مۇشەلەرىنىڭ جالپى سانىنىڭ كوپ بولىگى قاتىسقانىن بىلدىرەدى. ق ر «جوگوركۋ كەنەش رەگلامەنتى تۋرالى» زاڭىنىڭ 1-بابىنا سايكەس، دەپۋتاتتار وتىرىسىنا قاتىسىپ وتىرعاندار رەتىندە جينالىس زالىندا بار جانە داۋىس بەرۋ الدىندا تىركەلگەن دەپۋتاتتار ەسەپتەلەدى. ياعني، 61 دەپۋتات بولعان كەزدە كۆورۋم دا بولادى. سەنىمحات بەرۋ - داۋىس بەرۋگە مۇمكىندىك بەرگەنىمەن، كۆورۋمدى قۇرۋعا كەپىل بولا المايدى.
قولدا بار اقپارات بويىنشا 2020 -جىلدىڭ 10 قازانىنداعى جوگوركۋ كەنەشتىڭ كەزەكتەن تىس وتىرىسىنا 51 دەپۋتاتتىڭ قاتىسقانى جانە 10 دەپۋتاتتىڭ سەنىمحات بەرگەنى رەسمي تۇردە حابارلاندى. وسىلايشا، كۆورۋم بولعان جوق، ال كۆورۋمسىز قابىلدانعان شەشىمدەر زاڭسىز ءارى زاڭدى كۇشى جوق دەپ ەسەپتەلەدى. وسىعان بايلانىستى، ق ر پرەزيدەنتىنىڭ اپپاراتى ۇسىنعان قۇجاتتاردى پارلامەنتكە قايتاردى.
