قۇس تۇماۋى: ەتتى ەش قورىقپاستان الۋعا بولا ما

ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا قۇس تۇماۋىنا بايلانىستى حالىق اراسىندا قۇس ەتىن الۋدا قورقىنىش بار ەكەندىگى تۋرالى سۇراق قويىلدى.

«حالىق اراسىنداعى وسى ۇرەي تۇسىنىكتى. اتاپ ايتقاندا، جالپى ءارى ارنايى شارالار ەسكەرىلگەن. جالپى شارالار اياسىندا اۋرۋ پايدا بولعان وشاقتا ءتيىستى شەشىمدەر قابىلدانىپ، كارانتين ەنگىزىلەدى. اۋرۋ جۇقتىرعان قۇستار اسحاناعا جىبەرىلمەيدى. دەزينفەكتسيالىق جۇمىستارعا ەرەكشە ءمان بەرىلەدى. ال ارنايى شارالارعا توقتالساق، ءار قۇس فابريكالارىندا ىشكى وندىرىستىك باقىلاۋ قۇرىلىمى بولادى. ونداعى ءونىم ءتيىستى ساراپتامادان وتكىزىلىپ، سوعان سايكەس قۇس ونىمدەرى ساۋدا ورىندارىنا جەتكىزىلەدى. مۇنىمەن قوسا، ساۋدا ورىندارىندا، بازارلاردا زەرتحانالار ونىمدەردى تەكسەرەدى. وسى ورايدا تالاپقا ساي كەلەتىن ونىمدەر ساۋداعا جىبەرىلەدى»، - دەپ ءتۇسىندىردى گ. نۇرتازينا.

ونىڭ ايتۋىنشا، جۇمىرتقانى قايناتۋ ارقىلى زالالسىزداندىرۋعا بولادى. ءوز كەزەگىندە «قازاقستان قۇس وسىرۋشىلەر وداعى» ز ت ب پرەزيدەنتى رۋسلان ءشارىپوۆ برويلەر وسىرەتىن كاسىپورىنداردا اۋرۋ تىركەلمەگەنىن اتاپ ءوتتى.

وسى ورايدا جۇمىرتقا باعىتىنداعى ەكى قۇس فابريكاسىندا تاۋىقتاردا قۇس تۇماۋى بايقالدى. قۇس تۇماۋىنا شالدىققان قۇس ەتىنىڭ ادامعا قاۋىپسىز ەكەنىنە توقتالعان ول، «قار تۇسكەن كەزدە ۆيرۋس جويىلادى، سونداي-اق قايناتقان كەزدە (قۇس ەتى مەن جۇمىرتقانى) ۆيرۋس بولمايدى. ءبىزدىڭ ءونىم، ياعني جۇمىرتقا پەن ەت تازا ەكولوگيالىق بيدايمەن وسىرىلگەن قۇستان الىنعان ءونىم. سول ءۇشىن قايناتىپ، ءپىسىرىپ جەگەندە ول ۆيرۋس ولەدى. حالىققا ايتاتىنىم، ەتتى قورىقپاي جەۋگە بولادى. سەنبەسەڭىزدەر، اۋىرعان تاۋىقتى نەمەسە ۇيرەكتى تىرىدەي الىپ كەلىڭىزدەر. مەن ءوزىم سويىپ، قايناتىپ، ءدام تاتۋعا دايىنمىن»، - دەدى.

بۇدان بۇرىن حابارلانعانداي، ەلىمىزدە 46 ميلليوننان استام قۇس باسى بار. ونىڭ ىشىندە قۇس تۇماۋىنان كەلگەن شىعىن 0,9 پايىزدى قۇرادى. وسى ورايدا 7 وبلىستىڭ 78 ەلدى مەكەنىندە كارانتين ەنگىزىلدى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى