سايت ارقىلى مۇلكىن ساتپاق بولعان ەلوردا تۇرعىندارىن الاياقتار قالاي الدايتىنى بەلگىلى بولدى
بۇل تۋرالى قالالىق پوليتسيا دەپارتامەنتى كريمينالدىق پوليتسيا باسقارماسىنىڭ كيبەر قىلمىسپەن كۇرەس ءبولىمىنىڭ اعا جەدەل ۋاكىلى سايات دۇيسەنبايەۆ ايتتى، دەپ حابارلايدى قازاقپارات ءتىلشىسى.
ەلوردا تۇرعىندارى قالالىق پوليتسيا دەپارتامەنتىنە ينتەرنەت الاياقتىڭ قۇربانى بولعانى تۋرالى ارىز- شاعىم ءتۇسىرىپ جاتىر.
«تولىعىراق توقتالىپ وتسەم: ونلاين حابارلاندىرۋ سايتىندا (OLX) مەنشىك زاتىن ساتپاق بولعاندار جارناما بەرەدى. قازاقستاندا نەمەسە ەلوردادا جۇرگەن ينتەرنەت الاياقتىقپەن اينالىساتىندار حابارلاندىرۋدى زەردەلەپ، جەكە مۇلكىن ساتاتىن ادامدارعا WhatsApp ارقىلى حابارلاسىپ، ونىڭ مۇلكىن ساتىپ الامىن دەپ وتىرىك كەلىسەدى. جابىرلەنۋشىلەر مۇلكىن ساتىپ الامىن دەگەن الاياققا مۇلىكتىڭ سۋرەتىن جىبەرىپ، باعاسىن ايتىپ، ورتاق كەلىسىمگە كەلەدى. وسى ورايدا الاياق جابىرلەنۋشىگە اقشا اۋدارامىن دەگەن جەلەۋمەن بانك كارتاسىنىڭ ءنومىرىن، ج س ن ءنومىرىن، CVV كودىن سۇرايدى»، - دەيدى سايات دۇيسەنبايەۆ.
ونىڭ ايتۋىنشا، جابىرلەنۋشىلەر ينتەرنەت- الاياقتارعا الدانىپ، ولار سۇراعان مالىمەتتەردى بەرەدى. «الاياقتار جابىرلەنۋشىنىڭ بانك شوتىنا مۇلىكتىڭ باستاپقى سوماسىن سالادى. مىسالى، 1-1,5 ميلليون تەڭگە ارتىق سالادى دا، «سىزگە ارتىق اقشا سالىپ جىبەرىپپىن. بانك كارتاسىنىڭ قۇپيا كودىن بەرە الاسىز با؟ ارتىق كەتكەن اقشانى قايتارىپ قالايىق» دەپ الداۋ ارقىلى جابىرلەنۋشىنىڭ بانك كارتاسىنىڭ ءنومىرىن، ج س ن ءنومىرىن، CVV كودىن بىلەدى. ودان كەيىن جابىرلەنۋشىنىڭ كارتاسىنداعى قارجىنى تۇگەل شەشىپ الادى»، - دەيدى ول.
وسىنداي جاعدايعا تاپ بولعان 50 ادام پوليتسياعا شاعىمدانعان.
«ينتەرنەت-الاياقتارعا الدانعانداردىڭ كوبى - زەينەتكەر. تۇرعىنداردى وسىنداي جولمەن الدانىپ قالماۋعا شاقىرامىز. بانك كارتاسىنىڭ ءنومىرىن، ج س ن، CVV كودىن ەشكىمگە بەرۋگە بولمايدى. قازىرگى ۋاقىتتا كريمينالدىق پوليتسيا قىزمەتكەرلەرى جانە تەرگەۋ باسقارماسىنىڭ تەرگەۋشىلەرى وسى فاكتى بويىنشا 5 قىلمىستى اشتى. ونىڭ ىشىندە 3 ادام ۇستالىپ، تەرگەۋ امالدارى جۇرگىزىلىپ جاتىر»، - دەيدى سايات دۇيسەنبايەۆ.
اۆتور: زارينا قاھارمان
