بيىل قازاقستاننىڭ جالپى ىشكى ءونىمى قانداي بولادى - مينيستر بولجامى

«الەمدىك ەكونوميكا ءوسىمى حالىقارالىق ۇيىمداردىڭ كونسەنسۋس بولجامى بويىنشا، وسى جىلى 5 پايىزعا تومەندەيدى. ال 2021 - جىلى ءوسىم كۇتىلىپ وتىر. حالىقارالىق ۇيىمدار قازاقستان ەكونوميكاسىنىڭ ناقتى ءوسىمىن وسى جىلى مينۋس % 2,3- تەن مينۋس % 2 ارالىعىندا دەپ باعالايدى. كەلەسى جىلعا تۇراقتى ءوسىمدى بولجايدى»، - دەدى رۋسلان دالەنوۆ ۇكىمەت وتىرىسىندا.

مينيستر ەكونوميكا سەكتورلارىنىڭ قازىرگى ۇردىستەرىن ەسكەرە وتىرىپ، ۇلتتىق ەكونوميكا مينيسترلىگىنىڭ باعالاۋىنشا 2020 - جىلى قازاقستاننىڭ ناقتى جالپى ىشكى ءونىمنىڭ ءوسىمى مينۋس % 2,1- ءتى قۇرايتىنىن ءمالىم ەتتى.

جىلدىڭ 9 ايىندا نەگىزگى كاپيتالعا 8,3 تريلليون تەڭگە سوماسىندا ينۆەستيتسيا تارتىلدى. بۇل تۋرالى ۇكىمەت وتىرىسىندا قر ۇلتتىق ەكونوميكا ءمينيسترى رۋسلان دالەنوۆ ايتتى.

«نەگىزگى كاپيتالعا 8,3 تريلليون تەڭگە سوماسىندا ينۆەستيتسيا تارتىلدى. 13 ءوڭىر ءوسىم كورسەتتى. ونىڭ ىشىندە ەڭ جوعارى كورسەتكىشتەر - تۇركىستان وبلىسىندا جانە شىمكەنت قالاسىندا بايقالىپ وتىر. 4 وڭىردە تومەندەۋ تىركەلدى. ولار - قىزىلوردا، اتىراۋ، باتىس قازاقستان جانە قاراعاندى وبلىستارى»، - دەدى مينيستر.

ونىڭ دەرەگىنشە، قۇرىلىس سەكتورى تۇراقتى قارقىنمەن دامىپ كەلەدى. ورىندالعان جۇمىستاردىڭ كولەمى 10,5 پايىزعا ءوستى. جوعارى ءوسۋ تۇركىستان وبلىسىندا جانە شىمكەنت قالاسىندا بايقالادى. 9,6 ميلليون شارشى مەتر تۇرعىن ءۇي پايدالانۋعا بەرىلدى. بۇل وتكەن جىلدىڭ سايكەس كەزەڭىمەن سالىستىرعاندا 9 پايىزعا كوپ.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى