سەمەيدە «اباي جولى» جاياۋ جۇرگىنشىلەر كوشەسىنىڭ قۇرىلىسى اياقتالدى
بۇل - الماتى وبلىسىنىڭ سەمەيگە ابايدىڭ 175 جىلدىق مەرەيتويىنا وراي تارتۋى. جاياۋ جۇرگىنشىلەر كوشەسىنىڭ قۇرىلىسى ماۋسىم ايىندا باستالعان. ول اۋەزوۆ داڭعىلى مەن سەليەۆين كوشەسى قيىلىسىنان باستاپ، ەت كومبيناتىنا دەيىنگى ارالىقتى قامتيدى. جالپى ۇزىندىعى 2100 مەتردى قۇرايدى. كوشە بويىنا تاس توسەۋىش توسەلىپ، ورىندىقتار، بالالار جانە سپورت الاڭدارى ورناتىلعان. جارىقتاندىرۋ جۇرگىزىلىپ، ەكى مىڭ اعاش وتىرعىزىلدى. سونىمەن قاتار جوباعا ۇزىندىعى 1600 مەتردى قۇرايتىن ۆەلوجول ەنگىزىلگەن، ول تەمىر جولدان باستالىپ ەت كومبيناتى ماڭىندا اياقتالادى. بۇدان بولەك، كوشە بويىنا ابايدىڭ ناقىل سوزدەرى جازىلعان جەتى ستەللا ورنالاستىرىلعان.
«بۇگىنگى تاڭدا جۇمىس اياقتالىپ قالدى. الماتى وبلىسىنان گەودەزيستەر كەلىپ توپوگرافيالىق ءتۇسىرىلىم جۇرگىزۋدە. نىساندى قابىلداپ الۋ توبى كەلدى. ودان كەيىن ونى تۇرعىن- ءۇي كوممۋنالدىق شارۋاشىلىق دەپارتامەنتىنە وتكىزەدى. بۇل - الماتى وبلىسىنىڭ ابايدىڭ 175 -جىلدىعىنا وراي سىيلىعى، - دەپ اتاپ ءوتتى وندىرىستىك جۇمىس جەتەكشىسى رافايل حازيپوۆ. ايتا كەتەيىك، اتالعان جوبا قۇنى - 600 ميلليون تەڭگە.
