اقتوبەدە تۇركيادان كەلگەندەردەن سىناما العان دارىگەر ەرەجە بۇزعانى ءۇشىن جازالاندى

اقتوبەدە شەتەلدەن كەلگەندەر دارىگەرلەردىڭ جۇمىسىنا نارازىلىق ءبىلدىرىپ، پ ت ر سىناما الۋ ءساتىن الەۋمەتتىك جەلىگە جاريالاپ جىبەردى. وندا ءبىر تەرەزە ارقىلى سىناما تاپسىرعان ادامدار اراقاشىقتىقتى ساقتاماعان، ال دارىگەر سىناما الۋ ەرەجەسىن ەسكەرمەدى.

«العاش كەزدە ءبىز بۇل جاعداي اقتوبەدە ەمەس دەپ اقپارات بەردىك. ويتكەنى اۋەجايدان سۇراعاندا «بىزدە جوق» دەپ ايتتى. ۆيدەونى زەرتتەي كەلە وقيعانىڭ ا. دوسجانوۆا اتىنداعى جاتاقحانادا ورنالاسقان كاراتين ستاتسيونارىندا بولعانىن انىقتادىق. جولاۋشىلار تۇركيادان كەلگەن. ءبىرقاتار بۇزۋشىلىق انىقتالدى. مەديتسينا قىزمەتكەرىندە قورعانىش قۇرالى بولمادى، ماتەريال الۋ تەحنيكاسى بۇزىلعان. ادامدار الەۋمەتتىك اراقاشىقتىقتى ساقتاماعان. ستاتسيوناردىڭ جاۋاپتى اعا دارىگەرى تارتىپتىك جازاعا تارتىلدى. وعان ەسكەرتۋ بەرىلدى»، - دەدى وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى بەكبولات ءىزباساروۆ.

ايتا كەتەيىك، باس سانيتار دارىگەردىڭ سوڭعى قاۋلىسىنا سايكەس شەتەلدەن كەلگەندەر كارانتينگە جاتقىزىلىپ جاتىر. بارلىعى 495 پ ت ر تەست الىندى. ەكەۋىنەن كوروناۆيرۋس ينفەكسياسى انىقتالدى. بىرەۋى - تۇركىستان وبلىسىنىڭ تۇرعىنى. ول مارتوك اۋدانىنداعى اۋرۋحانادا ەم الىپ جاتىر. ال ەكىنشىسى - اقتوبە قالاسىنىڭ تۇرعىنى. ول ءۇي كارانتينىندە. ەكەۋى دە رەسەيدەن كەلگەن.

«وبلىستا جاعداي تۇراقتى. سوڭعى تاۋلىكتە ەشكىمنەن ۆيرۋس انىقتالمادى. بارلىعى 3257 ادام ۆيرۋس جۇقتىرسا، ونىڭ 98 پايىزدان استامى جازىلدى. ينفەكسيالىق ستاتسيوناردا 37 ناۋقاس ەم قابىلداپ جاتىر. ونىڭ تورتەۋى جانساقتاۋ بولىمىندە. وكپەنى جاساندى جەلدەتۋ اپپاراتىنا قوسىلعان ەشكىم جوق. بالالار ءدىن امان»، - دەدى بەكبولات ءىزباساروۆ.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى