ماڭعىستاۋلىق كەيۋانا ۇمىت قالعان ونەردى قايتا جاڭعىرتىپ ءجۇر
ءمارۋا اجىبايەۆا - قازاقتىڭ «كۇپى كيگەن» ۇلتتىق ونەرىن زاماناۋي ناقىشقا كەلتىرىپ، كوپكە دارىپتەپ ءجۇر. كەيۋانا بەينەۋ اۋدانى، سارعا اۋىلىنىڭ تۇرعىنى. قولونەر شەبەرى 1949 -جىلى دۇنيەگە كەلگەن. اتىراۋ مەديتسينا كوللەدجىن ءتامامداپ، ءوز اۋىلىنداعى دارىگەرلىك امبۋلاتوريادا ۇزاق جىلدار قىزمەت ەتتى. بۇگىندە 10 بالانى وسىرگەن «باتىر انا» ءوز شەشەسىنەن كورگەن ونەگەسىن ورىمدەپ، كيىز باسىپ وتىر.
«بۇرىندارى باسىلعان كيىز ۇزاتىلعان قىزدارعا دا بەرىلەتىن ەدى. قازىر ازايىپ بارادى. بۇل تەكەمەتتى استىنداعى قويدىڭ كۇزەم جۇنىنەن (كۇزدە قىرقىلعان قويدىڭ ءجۇنى) جاسايدى. سول ءجۇندى ساباپ، سوسىن قويدىڭ جاباعى ءجۇنىن بوياپ بەتىنە سالادى. ودان كەيىن شيگە وراپ، ىستىق سۋ قۇيىپ تارتادى. شيدە ءپىسىپ شىقسا باسۋى جەڭىل بولادى. ەكى جاعىن قايىرىپ تىگەدى، سوسىن وڭدەپ جايىپ قويادى. ءبىر ەكى توسەپ، قايتا ءپىسىرىپ وڭدەيدى. سونىمەن ادەمى بولىپ شىعادى» - ، دەپ جاسالۋ جولىمەن دە ءبولىستى.
بۇرىنعى اتا- بابامىزدان كەلە جاتقان ونەر، ءقازىر ۇمىتىلىپ بارا جاتىر. جاس كەزىمىزدە تۇرىش، اقجىگىت اۋىلدارىندا جاسايتىن ادامدار كوپ ەدى دەگەن وكىنىشىن دە جاسىرمادى.
«سىڭلىلەرىممەن بىرگە كۇنىنە ءبىر كيىز باساتىن ەدىك. قازىرگى تاڭدا زەينەتتەمىن. قولىم بوس ۋاقىتتا اپتاسىنا ءبىر كيىز باسامىن. تاپسىرىس قابىلدايسىز با دەپ كەلۋشىلەر بار، ءبىراق مەنىڭ وعان دەنساۋلىعىم جارامايدى، جاسىمىز دا ۇلكەيدى. نەمەرەلەرىم ءوسىپ كەلەدى سولار كورسىن، ۇيرەنسىن دەپ جاسايمىن»، - دەيدى ءمارۋا اپا.
