قىرعىزستان پرەزيدەنتى ەلدەگى جاعدايعا بايلانىستى حالىققا ۇندەۋ جولدادى
پرەزيدەنت اپپاراتىنىڭ اقپاراتتىق ساياسات ءبولىمىنىڭ مالىمەتىنشە، ۇندەۋدە ءبىرقاتار ماسەلەلەر قامتىلعان. قازاقپارات مالىمدەمەنىڭ ءماتىنىن جاريالايدى.
«قۇرمەتتى وتانداستار! كەي ساياساتكەرلەردىڭ شەكتەن تىس كەۋدەمسوقتىعىنىڭ كەسىرىنەن ءبىزدىڭ ازاماتتاردىڭ بەيبىت تىرشىلىگى مەن ەل تىنىشتىعىنا قاۋىپ ءتوندى. ساياسي ۇندەۋلەرمەن قاتار، ەلدىڭ بىرلىگى مەن قوعامنىڭ تىنىش ءومىرىن بۇزۋعا شاقىراتىن پروۆاكاتسيالىق ۇندەۋلەر دە بولدى. قىرعىزستان قاۋىپ-قاتەر شەگىندە تۇر. قىمباتتى قىرعىزستاندىقتار، حالقىمىزدىڭ بەيبىت تىرشىلىگى ساياسي ويىننىڭ قۇربانىنا اينالماۋى ءتيىس. مىنە، سول ءۇشىن ەل استاناسى بىشكەكتە توتەنشە جاعداي رەجيمى ەنگىزىلدى. بۇگىن مەن سول تۋرالى ءتيىستى جارلىققا قول قويدىم. كونستيتۋتسيالىق قۇزىرەتىمنىڭ اياسىندا مەن ازاماتتاردىڭ تىنىش ءومىرى مەن ەلدىڭ ءبىرتۇتاستىعىن ساقتاۋ ءۇشىن قولىمنان كەلگەننىڭ ءبارىن جاسايمىن. ەلدىڭ بۇكىل دەنى ساۋ كۇشى مەنى تولىق قولدايدى دەپ سەنەمىن. بۇگىن ءبىز مەملەكەتتىگىمىزگە شىنايى قاتەر تونگەنىن كورىپ وتىرمىز. سوندىقتان شەتتە قۇر قاراپ تۇرماي، وسى قيىن كۇندەردەن بىرگە شىعايىق. جاراتقان حالقىمىزدى جانە سۇيىكتى قىرعىزستانىمىزدى امان ساقتاسىن».
