رەسپۋبليكالىق جولدارعا ۆيدەوكامەراسى مەن جىلدامدىق ولشەگىشى بار اركالار ورناتىلادى
بۇل تۋرالى «قازاۆتوجول» ۇلتتىق كومپانياسى باسقارما ءتوراعاسىنىڭ ورىنباسارى تالعات سماعۇلوۆ ءمالىم ەتتى، دەپ حابارلايدى قازاقپارات ءتىلشىسى.
«ءبىز ينۆەستيتسيالىق كونكۋرس اياسىندا رەسپۋبليكا بويىنشا 11 مىڭ شاقىرىم جولعا اقىلى جۇيە ەنگىزەمىز. بۇل رەتتە ينتەللەكتۋالدىق- كولىكتىك جۇيەگە باسىمدىق بەرىلەدى. ياعني جولدىڭ بۇل ۋچاسكەلەرى كامەرالارمەن، سكوروستەمەرمەن جابدىقتالادى. سونىمەن قاتار الداعى ۋاقىتتا ۇزىن جولدارداعى جاياۋ جۇرگىنشىلەر وتەتىن بولىكتى جارىقتاندىرامىز»، - دەدى تالعات سماعۇلوۆ كومپانيانىڭ Instagram پاراقشاسىندا سۇراقتارعا جاۋاپ بەرە وتىرىپ.
ونىڭ ايتۋىنشا، نۇر- سۇلتان - شۋچينسك اراسىنداعى جولعا اركا ورناتىلعان. ول جەردە ۆيدەوكامەرا بار.
«ءبىزدىڭ مالىمەتتەرىمىز بويىنشا ءدال سول جەردە جول ەرەجەسىن بۇزۋدىڭ 8 مىڭ فاكتىسى تىركەلگەن. ونىڭ ىشىندە 39 جاعدايدا جۇرگىزۋشىلەر جىلدامدىقتى ساعاتىنا 200 شاقىرىمنان اسىرعان. الداعى ۋاقىتتا مەن اتاعان 11 مىڭ شاقىرىم جولدىڭ ءار 40-50 شاقىرىمىندا اركالار ورناتىلادى. ءدال سول جەردە ۆيدەوكامەرالار مەن جىلدامدىق ولشەگىشتەر قويىلادى»، - دەدى ول.
