گرۋزيادا بالالاردىڭ جولدان وتۋىنە كومەكتەسىپ جۇرگەن يت الەۋمەتتىك جەلىدە تانىمال بولدى
باتۋمي قالاسىنداعى كوشەلەردىڭ بىرىندە بۇل يت بالالاردى جولدان وتكىزىپ، اۆتوكولىكتەرگە ۇرەدى. جول قاۋىپسىزدىگىن قاداعالايتىن وسى جانۋاردىڭ قامقورشىسى دا بار ەكەن.
نونا زاكارەيشۆيلي، ءيتتىڭ يەسى:
- بىزگە ول وسىدان بەس جىل بۇرىن كەلدى. ءيتتى كۇتىپ، تاماعىن بەرەتىنمىن. قىستا توڭىپ قالماسىن دەپ قاراپ ءجۇردىم. ءبىراق ۇيىمە جىبەرمەيتىنمىن. وسىلاي ەكى جىل ءوتتى. ول ماعان ۇيرەنىپ، ۇنەمى ەسىگىمنىڭ قاسىندا وتىرادى. جانىم اشيدى، دەگەنمەن ءوزىمنىڭ دە ءيتىم بار، وۆچاركا، ءبىر- بىرىمەن باسى قوسىلمايتىن تۇقىمدار. ءبىراق ۋاقىت وتە، ارينە بويى ۇيرەنىپ قالدى. اتاعى شىققاننان كەيىن كوپ ادام بۇل ءيتتى وزىنە الۋعا نيەت ءبىلدىردى. ءبىراق ول مەنەن ايىرىلعىسى كەلمەيدى. ىلعي ارتىمنان ەرەدى. قايدا بارسام دا، دۇكەن نەمەسە ءدارىحانا قاسىندا مەنى كۇتىپ تۇرادى.
بۇل ءيتتىڭ اتى كوپ. بيم دەپ تە، كۋرشا دەپ تە اتايدى. ءبىراق جۇرتقا ول كۋپاتا دەگەن ەسىمىمەن تانىمال. بۇل اتتى جەرگىلىكتى ەت ساتۋشى قويعان. گرۋزيندەردىڭ ۇلتتىق شۇجىعىنىڭ جۋان ءبىر ءتۇرى وسىلاي اتالادى ەكەن. ءيتتىڭ يەسىنە بۇل ات ۇنامايدى. قوڭ الا باستاعالى دەنساۋلىعى دا سىر بەرگەن. جەرگىلىكتى ۆەتەرينارلار تانىمال ءيتتى تەگىن ەمدەيدى ەكەن.
گەورگيي كالاندادزە، ۆەتەرينار:
- ودان ساراپتاما الدىق. سالماعى شامادان اسىپ، باۋىرىن ماي باسقانىن انىقتالدى. استى دا دۇرىس قورىتپايدى. سونداي- اق قانىندا فوسفور ۇلەسى كوپ. ءبىزدىڭ ويىمىزشا، بۇل يت قىدىراتىن ساياباقتا فوسفور تىڭايتقىشتارىن قولدانىلادى. قازىر ديەتا بويىنشا تاماقتاندىرامىز. ويتكەنى ءبارىمىز دە كىنالىمىز. كۋپاتانىڭ تانىمالدىعى ارتقان سوڭ، وعان بۇرىشى بار شۇجىق پەن ەت سەكىلدى زياندى تاماقتى بەرە بەردىك. سوندىقتان تۇرعىنداردان وعان تاماق بەرمەۋىن سۇرايمىز.
بۇل يت دالادا وسكەندىكتەن، مىنەزى دە قىرسىق. ءبىراق بالالارعا وتە جاقىن جانە بوتەن ادامداردان دا جاتىرقامايدى. قازىر دە كوشە قيىلىسىن قالدىرماي، بالالارمەن قاتار ەرەسەكتەردى دە جولدان وتكىزىپ ءجۇر.
