تۇركىستاندا «الەم بالالاردىڭ كوزىمەن» سۋرەت كورمەسى اشىلدى
وندا باتىس قازاقستان وبلىسىنىڭ ەستۋ جانە سويلەۋ قابىلەتتەرى ناشار، زياتكەرلىك بۇزىلىستارى بار بالالارعا ارنالعان ارنايى مەكتەپ- ينتەرناتتار تاربيەلەنۋشىلەرىنىڭ جۇمىستارى قويىلعان، دەپ حابارلايدى قازاقپارات ءتىلشىسى.
اتالمىش شارا «ايالاعان الاقان» قوعامدىق قايىرىمدىلىق قورىنىڭ «ەرىكتىلەر جىلى» اياسىندا ۇيىمداستىرىلۋدا. قوعامنىڭ بارلىق بالالارى دارىندى ەكەنىن كورسەتۋ ماقساتىندا ءوتىپ جاتقان شارادا ونەرلى جاسوسپىرىمدەردىڭ سۋرەتتەرى قويىلدى. وندا بالالار ەشقانداي قيىندىقتارعا نەمەسە مۇمكىندىكتەرىنىڭ شەكتەۋلىگىنە قاراماستان، الەمگە مەيىرىمدى ءارى كىرشىكسىز تازا كوزدەرىمەن جانە ويلارىمەن قارايتىنىن كورسەتكەن. وسىنى ەسكەرگەن قوعامدىق قور بىرنەشە جىل قاتارىنان، اقىسىز نەگىزدە جانە ءوز باستاماسىمەن ەرەكشە قاجەتتىلىكتەرى بار بالالارعا سۋرەت سالۋدى ۇيرەتىپ كەلەدى.
جىل سايىن جاس سۋرەتشىلەردىڭ جۇمىستارىن تانىستىراتىن كورمەلەرى وتكىزىلەدى. اعىمداعى جىلى بالالاردىڭ تۋىندىلارىن كوپتەگەن ادامدارعا كورسەتە وتىرىپ، ەلىمىزدىڭ بارلىق قالالارىن قامتۋ كوزدەلىپ وتىر. تۇركىستان وبلىستىق «جاستار رەسۋرستىق ورتالىعىنىڭ» باسپا ءسوز حاتشىسى قاراشاش ەسەنبايدىڭ ايتۋىنشا، ەرەكشە بالالاردىڭ شىعارمالارى ورتالىقتا بىرنەشە كۇن وتەدى.
«ورتالىققا كەلۋشى جاستار وتە كوپ. ولار كورمەنى تاماشالاپ، كارتينالارمەن تانىسا الادى. ءقازىردىڭ وزىندە تۇركىستاندىق جاستاردىڭ العاشقى لەگى كورمەگە كەلدى. جالپى مۇنداي جوبالاردىڭ كوپتەپ وتكىزىلۋى ەرەكشە جاستاردى ىنتالاندىرادى. ولاردىڭ قوعامنان الىستاماۋىنا ىقپال ەتىپ، كەرىسىنشە قوعامنىڭ باسقا مۇشەلەرىنە شابىت سىيلايدى»، - دەيدى قاراشاش ەسەنباي.
ال، كورمەنىڭ ۇيىمداستىرۋشىسى ءارى «ايالاعان الاقان» قورىنىڭ جەتەكشىسى رادا حايرۋشيەۆا كەز كەلگەن جانعا جاقسىلىق جاساۋ ءۇشىن كوپ اقشا قاجەت ەمەس، تەك كومەككە دەگەن ۇلكەن ىقىلاس، كوڭىل مەن قامقورلىق جانە كىشكەنە بوس ۋاقىت كەرەك ەكەنىن ايتادى. ايتا كەتەيىك، بۇگىنگى كۇنگە دەيىن قور مىڭنان استام بالانى ءارتۇرلى باعىتتا وقىتقان جانە ول بىرنەشە جىل بويى تەگىن جۇزەگە اسىرىلۋدا. بالالاردىڭ مۇنداي ساباقتارعا اپتا سايىن قاتىسۋىنا مۇمكىندىك جاسالعان. ۇيىرمەلەرگە قاجەتتى وقۋ قۇرالدارىن قامقور ازاماتتار جەتكىزىپ بەرەدى.
