جامبىلدىق وقۋشى شاعىن تراكتور جاساپ الدى

جامبىل وبلىسى سارىسۋ اۋدانىنداعى ايتەكە بي اتىنداعى ورتا مەكتەپتىڭ وقۋشىسى شاعىن تراكتور جاساپ شىعاردى. ساۋداكەنت اۋىلىنىڭ بالاسى باقتيار تۇرعانبايەۆ شاعىن اگروماشينانى كۇندەلىكتى تۇرمىستىق قالدىقتان جاساعان.

بۇل تۋرالى ساۋداكەنت اۋىلىنداعى اۋداندىق ءبىلىم ءبولىمىنىڭ تەحنيكالىق شىعارماشىلىق ورتالىعىنىڭ ديرەكتورى مۇحتار مەلدەيەۆ بىلاي دەيدى. «مەكتەپتەردەگى «اۆتو-21» ۇيىرمەسىنە 10-11 - سىنىپتىڭ وقۋشىلارى قاتىسادى. ايتەكە بي اتىنداعى مەكتەپتىڭ 11 - سىنىپ وقۋشىسى باقتيار «اۋىل شارۋاشىلىق تەحنيكالار مەن جابدىقتار سالاسىنداعى تەحنيكالىق قۇراستىرۋ» اتالىمى بويىنشا «شاعىن تراكتور» تاقىرىبىنداعى جۇمىسىن ءساتتى قورعاپ شىقتى. جەتەكشىلىك ەتكەن ساپارعالي بايۋلييەۆ ىزدەنىمپاز، ونەرتاپقىش وقۋشىعا ناقتى باعدار، باقىت بەرىپ وتىردى»، - دەيدى ورتالىق ديرەكتورى.

باقتياردىڭ ءوزى بۇل يدەيا اۋىل تۇرمىسىنداعى كۇندەلىكتى قاجەتتىلىكتەن دە تۋىنداعانىڭ ايتادى. اۋىلدى جەردە ءۇي اۋلاسى كەڭ، باۋ- باقشا دا ۇلكەن. جەردى قولمەن اۋدارىپ، وڭدەۋ قيىنعا سوعادى. جاس ونەرتاپقىش جۇمىستى جەڭىلدەتۋدىڭ جولىن ىزدەپ، شاعىن اگروماشينا جاساۋعا بەل بۋادى.

«كادىمگى ۇلكەن تراكتوردىڭ اتقاراتىن قىزمەتىن اتقارادى. تراكتور قىرىق ءتۇرلى بولشەكتەن قۇراستىرىلدى. قوزعالتقىش رەتىندە كادىمگى بەنزينمەن جۇمىس ىستەيتىن سۋسورعى موتوردى پايدالاندىم. ال قاڭقاسىن ۇيدەگى تەمىر قالدىقتارىنان جينادىم. ۋاز- دىڭ دوڭگەلەگى. الدىڭعى دوڭگەلەك ۇيدە جاراماي قالعان ءشوپ شالعىسىنىكى. ال، ورىندىعى «گازەلدىكى». ارتىنا زات سالىنادى. تىركەگىشى بار. سوقا جەگىلەدى»، - دەيدى جاس ونەرتاپقىش.

شاعىن تراكتور اۋىلدارداعى ۇلكەن تەحنيكالار بارا المايتىن كىشىگىرىم باقتار مەن ساياباقتاردىڭ ىشىندەگى اگروتەحنيكالىق جۇمىستاردى جۇرگىزۋگە وتە قولايلى. ارىق قازىپ، جەر جىرتۋعا دا تاپتىرماس تەحنيكا جانارمايدى دا كوپ قاجەت ەتپەيدى. قازىردىڭ وزىندە ءارتۇرلى تەحنيكانىڭ بولشەكتەرىنەن قولدان قۇراستىرىلعان شاعىن تراكتورعا اۋدان ديقاندارى قىزىعۋشىلىق تانىتىپ وتىر ەكەن.

اۆتور: سايا سەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى