قىزىلوردادا جول-كولىك وقيعاسىنا كىنالى تۇرعىن اسپانعا وق اتتى
وبلىس ورتالىعىنداعى نۇرسۇلتان نازاربايەۆ داڭعىلى مەن سۇلتان بەيبارىس كوشەلەرىنىڭ قيىلىسىندا ەكى جەڭىل اۆتوكولىكتىڭ قاتىسۋىمەن جول-كولىك وقيعاسى ورىن العان. وعان كىنالى 46 جاستاعى جۇرگىزۋشى زارداپ شەككەن اۆتوكولىك يەسىنە شىعىنىن وتەۋ ماقساتىندا 30 مىڭ تەڭگە تولەۋگە كەلىسەدى. وسى ماقساتتا ۇيىنە زارداپ شەككەن ازاماتتى ەرتىپ كەلەدى. ودان كەيىن ول اشۋعا بەرىلىپ، مىلتىقپەن اسپانعا ءبىر مارتە وق اتقان.
«قىزىلوردا قالالىق پوليتسيا باسقارماسىنىڭ جەدەل باسقارۋ ورتالىعىنا قالا تۇرعىنىنان كورشىسىنىڭ مىلتىق اتىپ جۇرگەندىگى تۋرالى حابارلاما ءتۇستى. بۇل بويىنشا ق ر قىلمىستىق كودەكسىنىڭ 293-بابىنىڭ 3-بولىگىنىڭ 2-تارماعىمەن (بۇزاقىلىق) سوتقا دەيىنگى تەرگەپ-تەكسەرۋ امالدارى جۇرگىزىلۋدە. ايعاق زاتتار رەتىندە اڭشى مىلتىعى الىندى. كۇدىكتىگە قاتىستى «ەشقايدا كەتپەۋ جانە ءتيىستى مىنەز-قۇلىق تۋرالى» قولحات تۇرىندەگى بۇلتارتپاۋ شاراسى قولدانىلدى. جول-كولىك وقيعاسىنا بايلانىستى قۇقىقتىق باعا بەرىلەدى. ساراپتامالار تاعايىندالىپ، ءمان-جايلار انىقتالۋدا. ءىستىڭ تەرگەلۋى دەپارتامەنت باسشىلىعىنىڭ باقىلاۋىنا الىندى»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنىڭ باسپا ءسوز قىزمەتى.
اۆتور: ءادىلجان ۇمبەت
