قازاقستاندا ءداستۇرلى ءبىلىم بەرۋ تۇرىنە كوشۋ ماسەلەسى پىسىقتالىپ جاتىر
«جاڭا وقۋ جىلىنا دايىندىق ماسەلەلەرىن جان- جاقتى ساراپتاۋ، قوعاممەن كەڭىنەن تالقىلاۋ قورىتىندىسىندا، سونىمەن قاتار ءاربىر وڭىردەگى ەپيدەميولوگيالىق احۋالدى ەسكەرە وتىرىپ، ءبىلىم جانە عىلىم مينيسترلىگى ءبىلىم بەرۋدىڭ ءار ءتۇرىن (قاشىقتان، شتاتتى جانە ارالاس) پايدالانۋ تۋرالى شەشىم قابىلدادى. بۇگىندە 3,4 ميلليون بالا (ونىڭ ىشىندە 2613428 بالا قاشىقتان رەجيمدە، 252343 بالا مەكتەپتەردە شتاتتى ءبىلىم بەرۋ رەجيمىندە، 546776 بالا كەزەكشى سىنىپتاردا) مەكتەپتە ءبىلىم الىپ جاتىر»، - دەدى پرەمەر- مينيستر.
ونىڭ اتاپ وتۋىنشە، قاشىقتان وقىتۋ ءتۇرىن ءتۇسىندىرۋ ءۇشىن اتا- انالارمەن قوسىمشا جۇمىستار ۇيىمداستىرىلدى. اتاپ ايتقاندا، 20 - تامىز بەن 17 - قىركۇيەكتە جالپى رەسپۋبليكالىق اتا- انالار جينالىسى، ال 21 - تامىزدا جالپى رەسپۋبليكالىق سىنىپ ساعات وتكىزىلدى. وقۋ پروتسەسىنىڭ قاۋىپسىزدىگىن قامتاماسىز ەتۋ ءۇشىن دەنساۋلىق ساقتاۋ مينيسترلىگى سانيتارلىق ەرەجە ازىرلەپ بەكىتتى. ەرەجەدە ءبىلىم بەرۋدىڭ بارلىق تۇرلەرىن ەسكەرە وتىرىپ، ءبىلىم نىساندارىنا قويىلاتىن تالاپتار قامتىلدى. قاشىقتان وقىتۋدى ەنگىزۋگە وڭىرلەردىڭ باسىم بولىگىندەگى مەكتەپتەردە بالا سانىنىڭ كوپتىگى دە تۇرتكى بولدى.
«دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، 12 جاستاعى جانە ودان ۇلكەن جاستاعى بالالار كوروناۆيرۋس ينفەكسياسىنىڭ تارالۋىندا بەلسەندى ءرول وينايدى. 2020 -جىلدىڭ 4 - قازانىنداعى جاعدايعا سايكەس، مەكتەپ وقۋشىلارى اراسىندا كوروناۆيرۋس ينفەكسياسىنا شالدىعۋدىڭ 136 جاعدايى تىركەلدى. ونىڭ ىشىندە 51 بالا باستاۋىش كەزەكتى سىنىپتاردا، 85- ءى قاشىقتان وقيدى»، - دەدى اسقار مامين.
ۇكىمەت باسشىسىنىڭ اتاپ وتۋىنشە، بۇگىندە گەرمانيا، رەسەي، ۇلى بريتانيا، پولشا، فرانسيا، ا ق ش، وڭتۇستىك كورەيا، ءۇندىستان سىندى ەلدەر كوروناۆيرۋستىڭ جىلدام تارالۋىنا بايلانىستى ءداستۇرلى تۇردە ءبىلىم بەرەتىن مەكتەپتەردى كارانتينگە جاۋىپ جاتىر.
«دەگەنمەن، مەملەكەت باسشىسىنىڭ تاپسىرماسىنا سايكەس، قازىرگى ۋاقىتتا بەيىندى مەملەكەتتىك ورگاندار كەزەڭ- كەزەڭمەن جۇمسارتۋ جانە ءداستۇرلى ءبىلىم بەرۋ تۇرىنە ورالۋ ماسەلەسىن زەردەلەپ جاتىر»، - دەدى پرەمەر- مينيستر.
اۆتور: مارلان جيەمباي
