ەلىمىزدە كوروناۆيرۋسقا قاتىستى احۋال قانداي
«جالپى، قازىرگى ۋاقىتتا قازاقستان رەسپۋبليكاسىنداعى COVID-19 بويىنشا اعىمداعى ەپيدەميولوگيالىق احۋالدى تۇراقتى دەپ باعالاۋعا بولادى. رەسپۋبليكادا ىندەت باستالعان ساتتەن باستاپ وسى جىلدىڭ 6-قازانىنا دەيىن COVID-19 دىڭ ناقتىلانعان 108296، ونىڭ ىشىندە سوڭعى تاۋلىكتە 60 جاعدايى تىركەلدى. ءوسىم 0,06 پايىزدان دا تومەن. بۇعان قوسا، جالپى رەسپۋبليكا بويىنشا رەسپۋبليكا بويىنشا سوڭعى 10 كۇندە كوروناۆيرۋسقا شالدىعۋدىڭ تاۋلىكتىڭ ءوسىمى 0,06 پايىزدان اسپايدى. ءبىرقاتار وڭىردە، اتاپ ايتقاندا اقتوبە مەن قىزىلوردا وبلىستارىندا سوڭعى 3 تاۋلىك بويى بىردە-ءبىر كوروناۆيرۋس ينفەكسياسىنا شالدىعۋ دەرەگى تىركەلگەن جوق. وڭىرلەردىڭ كوپشىلىگندە بىرەن-ساران عانا جاعداي تىركەلىپ وتىر. COVID-19-دان ءولىم- ءجىتىم سانى دا كۇرت قىسقاردى. سوڭعى تاۋلىكتە 3 ناۋقاس قايتىس بولدى. بارلىق ناۋقاستاردىڭ 95 پايىزى نەمەسە 103367 ادام، ونىڭ ىشىندە سوڭعى تاۋلىكتە 90 ادام جازىلىپ شىقتى»، - دەدى البەرت اسقاروۆ.
سونىمەن قاتار جەدەل ورتالىق ديرەكتورى ەلىمىزدە كوروناۆيرۋس ىندەتىنىڭ جاڭا تولقىنىنىڭ ورىن الۋىنا قاتىستى الاڭداۋشىلىققا وراي پىكىرىن ءبىلدىرىپ ءوتتى.
«الەمنىڭ چەحيا، فرانسيا، نيدەرلاند، ۆەنگريا، يزرايل سىندى كوپتەگەن ەلدەردە، سونداي-اق ت م د بويىنشا ۋكراينا، گرۋزيا سىندى كورشىلەس مەملەكەتتەردە قازىردىڭ وزىندە COVID-19 دىڭ ەكىنشى تولقىنى كەلگەنىن اۋرۋعا شالدىققاندار ستاتيستيكاسى كورسەتىپ وتىر. بولجامدارعا قاراعاندا قازاقستان رەسپۋبليكاسىندا كوروناۆيرۋس ىندەتىنىڭ ەكىنشى تولقىنى قاراشا-جەلتوقسان ايلارىندا ورىن الىپ قالۋى ىقتيمال. بۇل ورايدا دەنساۋلىق ساقتاۋ ورگاندارى مەن ۇيىمداردىڭ COVID-19-دىڭ جاڭا تولقىنىنا دايىن ەكەندىگىن اتاپ وتكەن ءجون. قاجەتتى ءدارى- دارمەك، وكپەنى جاساندى جەلدەتۋ اپپاراتتارى، جەكە قورعانىس قۇرالدارى، مەديتسينالىق قۇرال جابدىقتار مەن مەديتسينالىق ماقساتتاعى بۇيىمدار ساتىپ الىنىپ، قور قۇرىلدى»، - دەدى ول.
ونىڭ اتاپ وتۋىنشە، ەلىمىزدىڭ ءبىرقاتار وڭىرىندە موۋلدىك جاڭا جۇقپالى اۋرۋلار اۋرۋحانالارى سالىنىپ جاتىر. اۋرۋ ورشىگەن جاعدايعا پروۆيزورلىق، ينفەكسيالىق جانە رەانيماتسيالىق توسەك- ورىن قورى قۇرىلدى. سوڭعى الەمدىك تاجىريبەگە سايكەس، كوروناۆيرۋس ىندەتىن جۇقتىرعان ناۋقاستاردى ەمدەۋ حاتتاماسىنا وزگەرتۋلەر ەنگىزىلدى. الدىن الۋ جانە ەپيدەمياعا قارسىشارالار جۇرگىزۋ الگوريتمى قايتا قارالدى.
«ونلاين رەجيمدە مەديتسينا قىزمەتكەرلەرىن وقىتۋ تۇراقتى تۇردە جۇرگىزىلىپ جاتىر. سونىمەن قاتار كوروناۆيرۋس ىندەتىنىڭ جاڭا تولقىنىنا دايىندىقتى ارتتىرۋعا باعىتتالعان وزگە دە شارالار جۇزەگە اسىرىلۋدا»، - دەدى البەرت اسقاروۆ.
اۆتور: مارلان جيەمباي
