ايگەرىم كۇكەيەۆا: قالاعا كوشىپ كەتكەندەردىڭ ۇشتەن ءبىر بولىگى اۋىلدارىنا قونىس اۋدارۋعا دايىن
بۇل تۋرالى بۇگىن ەلوردادا وتكەن اۋىل جاستارىنىڭ II رەسپۋبليكالىق فورۋمىندا جاستار قاناتىنىڭ ءتوراعاسى ايگەرىم كۇكەيەۆا ايتتى، دەپ حابارلايدى قازاقپارات ءتىلشىسى.
اۋىل جاستارىنىڭ II رەسپۋبليكالىق فورۋمىندا «اۋىل» حالىقتىق - دەموكراتيالىق پاتريوتتىق پارتياسىنىڭ باستاماسىمەن «اۋىل» ح د پ پ جاستار قاناتىنىڭ ەرەجەلەرىنە وزگەرتۋلەر ەنگىزۋ ماقساتىندا جاڭا قۇرامعا داۋىس بەرىلدى. فورۋمعا قاتىسۋشىلار اتقارۋ كوميتەتىنىڭ جاڭا قۇرامىن ماقۇلداپ، جاستار قاناتىنىڭ ءتوراعاسىن سايلادى. بۇل قىزمەتكە س. سەيفۋللين اتىنداعى قاز ا ت ۋ- دىڭ تاربيە جۇمىسى دەپارتامەنتىنىڭ ديرەكتورى ايگەرىم كۇكەيەۆا ءبىراۋىزدان سايلاندى.
«قازاقستاندا 18 ميلليوننان استام تۇرعىن بولسا، ونىڭ 14,5 ميلليونى 14-29 جاس ارالىعىنداعى جاس بۋىن. ەلىمىزدىڭ قاي وڭىرىندە بولسىن جاستار بار. ولاردىڭ كوپ شوعىرلانعان جەرى - اۋىل. جاستاردىڭ كۇشىن بىرىكتىرمەي اۋىلدى كوركەيتۋ - كۇردەلى شارۋا. مەملەكەتتىڭ تۇراقتى دامۋىنىڭ نەگىزى - باسەكەگە قابىلەتتى جاستار. ال بۇل تىكەلەي جاس قازاقستاندىقتاردىڭ ءبىلىم مەن بىلىك ساپاسىنا، ىنتاسى مەن ۇمتىلىسىنا بايلانىستى. سوندىقتان مەملەكەتتىك ساياساتتىڭ نەگىزگى باعىتتارىنىڭ ءبىرى - جاستار سەكتورى. قازاقستاندا جاستار سەكتورىنا ايرىقشا نازار اۋدارىلۋى ءتيىس»، - دەيدى جاستار قاناتىنىڭ ءتوراعاسى ايگەرىم كۇكەيەۆا.
ول اۋىل جاستارىنىڭ قالاعا قونىس اۋدارۋ ءۇردىسى قارقىن الىپ كەلە جاتقانىن ايتتى.
«وعان بىرنەشە فاكتور اسەر ەتۋدە. ول - ەرتەڭگە دەگەن سەنىمنىڭ بولماۋى، جاستاردىڭ بوس ۋاقىتىنىڭ ءتيىمسىز ءوتۋى، مەديتسينالىق قىزمەت كورسەتۋ ساپاسىنىڭ تومەندىگى، سىبايلاس جەمقورلىق. اۋىل تۇرعىندارىنىڭ ۇشتەن ءبىر بولىگى وزدەرىنىڭ ەلدى مەكەندەرىنە قونىس اۋدارۋعا دايىن. تالداۋ جۇمىستارى كورسەتكەندەي، وڭىردەگى جاستاردىڭ جاعدايى ءماز ەمەس. جاستار ءوز ءومىرىن اۋىلمەن بايلانىستىرۋ ءۇشىن تۇراقتى جۇمىس، لايىقتى ەڭبەكاقى، ءومىر سۇرۋگە قولايلى ينفراقۇرىلىمنىڭ بولعانىن قالايدى. ەگەر بەلگىلەنگەن جوسپارلار دۇرىس ورىندالسا - مەملەكەتتىك جاستار ساياساتى بەلگىلى ءبىر ناتيجەگە جەتەرى انىق. ال جاستار ءومىرى ساپالى، جاڭا دەڭگەيگە كوتەرىلەدى»، - دەيدى ول.
اۆتور: زارينا قاھارمان
