مەملەكەت باسشىسى كوروناۆيرۋسقا قاتىستى تەستىلەۋ كولەمىن ارتتىرۋدى تاپسىردى

«ەپيدەميانى اۋىزدىقتاۋ - وڭاي شارۋا ەمەس. ونىڭ ەكونوميكاعا جانە حالىقتىڭ ءال-اۋقاتىنا تيگىزەتىن سالدارىن بارىنشا ازايتۋ - ماڭىزدى مىندەت. ءبىز جان- جاقتى ويلاستىرىلعان جانە ناقتى شارالار قابىلداۋىمىز كەرەك»، - دەدى مەملەكەت باسشىسى كوروناۆيرۋس ىندەتىنىڭ ەكىنشى كەزەڭىنە دايىندىق ماسەلەلەرى بويىنشا كەڭەستە.

وسى ورايدا پرەزيدەنت ءبىرقاتار تۇيتكىلدى ماسەلەلەرگە توقتالدى.

«تەستىلەۋ كولەمىنىڭ تومەندەۋى ءۇردىسى بايقالىپ وتىر. تاۋلىگىنە 40 تان 60 مىڭعا دەيىن زەرتتەۋ جۇرگىزۋ مۇمكىندىگى بولعانىمەن، ورتاشا ەسەپپەن 18 مىڭ زەرتتەۋ جاسالۋدا. زەرتحانالاردىڭ جۇكتەمەسى 40 پايىز شاماسىندا»، - دەدى ق. توقايەۆ.

پرەزيدەنت وڭىرلىك بولىنىستە كولەمدى تەڭەستىرۋگە قول جەتكىزىلمەگەنىن ەسكەرتتى. بيىلعى 5-قازانداعى جاعداي بويىنشا 100 مىڭ ادامعا شاققانداعى ەسەپتەۋدە تەستىلەۋدىڭ تومەنگى دەڭگەيى قىزىلوردا، الماتى وبلىستارىندا، شىمكەنت قالاسىندا انىقتالعان، ال جوعارى دەڭگەي اتىراۋ، باتىس قازاقستان وبلىستارىندا تىركەلدى. زەرتتەۋلەردىڭ ەڭ جوعارى كولەمى بيىلعى ماۋسىم ايىندا جۇرگىزىلگەن، ياعني تاۋلىگىنە 33 مىڭعا جەتتى. 2020 -جىلعى 5-قازاندا 11 مىڭعا جۋىق زەرتتەۋ جاسالدى. قازىرگى جاعدايدا مۇنداي كورسەتكىش وتە از ەكەنىنە توقتالعان پرەزيدەنت، ء«بىز ناقتى احۋالدى ءبىلۋىمىز كەرەك. سوندىقتان دا تەستىلەۋدەن وتكىزۋ كولەمىن ارتتىرۋ بويىنشا شارالار قابىلداعان ءجون»، - دەدى.

مەملەكەت باسشىسىنىڭ ايتۋىنشا، زەرتحانا جەلىسى كەڭەيتىلىپ، بارشا الەمدە تەستىلەۋ قۇنى تومەندەگەنىنە قاراماستان، ەلىمىزدە تەستىلەۋ باعاسى ءالى دە جوعارى بولىپ تۇر.

بۇل تۇرعىدا 10 نان 18 مىڭ تەڭگەگە دەيىن جەتەدى.

«حالىقتىڭ باسىم بولىگىنە بۇل سوما ءتيىمسىز بولىپ تۇر دەپ سانايمىن. ۇكىمەت پەن اكىمدەردەن تەستىلەۋدىڭ قارجىلىق ماسەلەسىن شەشۋ تالاپ ەتىلەدى»، - دەدى قاسىم-جومارت توقايەۆ.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى