قاسىم-جومارت توقايەۆ انا ءولىمىنىڭ كوبەيۋىنە الاڭداۋشىلىق تانىتتى

بۇل تۋرالى كوروناۆيرۋس ىندەتىنىڭ ەكىنشى كەزەڭىنە دايىندىق ماسەلەلەرى بويىنشا كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«ۇكىمەت مەديتسينالىق كومەكتىڭ وزگە تۇرلەرىن دە كورسەتۋدى ۇمىتپاۋعا ءتيىس. انا مەن بالا دەنساۋلىعىن قورعاۋ - نەگىزگى باسىمدىقتىڭ ءبىرى. وكىنىشكە قاراي، انا ءولىمى كورسەتكىشى بارلىق وڭىردە بىرنەشە ەسە كوبەيىپ كەتتى. بىلتىرعى 8 ايدا - 36 ايەل قايتىس بولسا، بيىلعى 8 ايدا - 131 ايەل قايتىس بولىپتى. مىسالى، اقتوبە وبلىسىندا بۇل كورسەتكىش شامامەن 13 ەسە، قىزىلوردا وبلىسىندا 9 ەسە، شىمكەنت قالاسىندا 7 ەسە ارتتى. نەگە بۇل ادامدارعا كومەك كورسەتىلمەدى؟ قانداي شارالار قابىلدانىپ جاتىر؟ بۇل وتە وزەكتى سۇراقتار. ولارعا اكىمدەر جاۋاپ بەرۋ كەرەك»، - دەدى مەملەكەت باسشىسى.

قازاقستان پرەزيدەنتى ۇكىمەتكە وڭىرلەرمەن بىرلەسىپ، اتالعان فاكتىلەردىڭ ءارقايسىسىن تەكسەرىپ، ناتيجەسىن بايانداۋدى تاپسىردى.

«انا مەن بالانى قورعاۋ، ونكولوگيالىق، كارديولوگيالىق، پۋلمونولوگيالىق جانە مەديتسينالىق كومەكتىڭ باسقا دا تۇرلەرىن كورسەتۋ - ەل الدىنداعى مىندەتىمىز. اكىمدەردى، جالپى ۇكىمەتتى بۇل مىندەتتەن ەشكىم بوساتقان جوق. پرەزيدەنت اكىمشىلىگىنە وسى ماسەلەنى باقىلاۋعا الۋدى تاپسىرامىن»، - دەدى قاسىم-جومارت توقايەۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى