ورالدا اۆتوكولىك ايالدامانى قيراتىپ كەتتى

ب ق و پوليتسيا دەپارتامەنتىنىڭ رەسمي وكىلى بولاتبەك بەلگىبەكوۆتىڭ ءمالىم ەتكەنىندەي، وقيعا 6 -قازان كۇنى تۇنگى ساعات 23.00 دە گاگارين كوشەسى «مەحوۆايا» ايالداماسىندا بولدى. 31 جاستاعى جۇرگىزۋشى ايداعان «لادا پريورا» اۆتوكولىگى ايالداماعا بارىپ سوعىلعان. جول اپاتى سالدارىنان جۇرگىزۋشى مەن 30 جاستاعى جولاۋشى ءتۇرلى دەنە جاراقاتتارىمەن وبلىستىق اۋرۋحاناعا جەتكىزىلدى. باسقا ەشكىم زارداپ شەككەن جوق.

«قازىرگى كەزدە بىرنەشە ساراپتاما تاعايىندالدى. سونىڭ ىشىندە ادامنىڭ الكوگولدىك ىشىمدىك ىشكەن-ىشپەگەندىگىن انىقتايتىن سوت-حيميالىق ساراپتاما جۇرگىزىلەدى. سونىڭ قورىتىندىسىنا سايكەس ناقتى پروتسەسسۋالدىق شەشىم قابىلدانادى. سونىمەن قاتار كەلتىرىلگەن شىعىن انىقتالۋ ۇستىندە»، دەدى قازاقپارات تىلشىسىنە ب. بەلگىبەكوۆ. ب ق و پوليتسيا دەپارتامەنتى جۇرگىزۋشىلەردى جولدا ءجۇرۋ ەرەجەسىنە نەمقۇرايلى قاراماي، قاعيدالارىن ساقتاۋعا، جاياۋ جۇرگىنشىلەردى بەلگىلەنگەن جەردەن وتۋگە شاقىرادى. وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ ناقتىلاۋىنشا، 30 جاستاعى ەر ادام سىنىق جانە جابىق باس-مي جاراقاتىن الىپ، ميى شايقالعان. ماس كۇيىندە بولعان. ومىرتقاسىنا زاقىم كەلگەن 31 جاستاعى ەر ادامنىڭ دا جاعدايى اۋىر. قازىر ەكەۋى دە جانساقتاۋ بولىمىندە جاتىر.

ەسكە سالا كەتەيىك، بۇدان بۇرىن «كاماز» بەن جەڭىل كولىك سوقتىعىسىپ، ءبىر ادامنىڭ قازا تاپقانىن جازعان بولاتىنبىز.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى