بىشكەكتە نارازىلىق بىلدىرۋشىلەر اق ءۇيدىڭ اۋماعىنا باسىپ كىردى

دۇيسەنبى كۇنى تاڭەرتەڭ پارلامەنتكە وتپەگەن پارتيالاردىڭ جاقتاۋشىلارى بىشكەك ورتالىعىندا ميتينگكە شىقتى. اكسياعا قاتىسۋشىلار سايلاۋ قورىتىندىلارىمەن كەلىسكەن جوق. ەلدىڭ ىشكى ىستەر مينيسترلىگىنىڭ حابارلاۋىنشا، «شۋ داڭعىلىمەن قوزعالىپ، جوگوركۋ كەنەش عيماراتىن قورشاعان تەمىر قاقپانى سىندىرۋعا ارەكەتتەنگەن ميتينگ قاتىسۋشىلارىن ارنايى تەحنيكانىڭ كومەگىمەن قۋۋعا تۋرا كەلگەن. ال ولار تاس لاقتىرىپ، قاقپادان وتپەك بولعان».

الدىن الا مالىمەتكە قاراعاندا، جەكسەنبى كۇنى وتكەن داۋىس بەرۋ قورىتىندىلارى بويىنشا 16 پارتيانىڭ ىشىندە پارلامەنتكە تورتەۋى - «بىرىمدىك»، «مەكەنىم قىرعىزستان»، «قىرعىزستان» جانە «بۋتۋن قىرعىزستان» وتكەن. قالعاندارى 7 پايىز داۋىس جيناي الماعان.

ەلدىڭ دەنساۋلىق ساقتاۋ مينيسترلىگىنىڭ مالىمەتىنشە، بىشكەكتە جەرگىلىكتى ساعات 24.00-دەگى جاعداي بويىنشا ميتينگىگە قاتىسۋشىلاردى تارقاتۋ بارىسىندا زارداپ شەككەن 122 ادام اۋرۋحاناعا جەتكىزىلدى.

ايتا كەتەيىك، 4 - قازاندا وتكەن سايلاۋ قورىتىندىسىنا نارازىلىق بىلدىرگەن ادامدار الا- توو الاڭىنا شىعىپ، ميتينگ وتكىزگەن بولاتىن. بۇدان سوڭ ميتينگىگە شىققاندار اق ءۇيدى قورشاپ الدى. قىرعىزستان پرەزيدەنتى سوورونباي جەەنبەكوۆ پارلامەنتتىك سايلاۋعا قاتىسقان پارتيا كوشباسشىلارىمەن كەزدەسەدى.

اۆتور: زارينا تۋعانبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى