ماڭعىستاۋدا ايەل بالالارىن بۇرىنعى كۇيەۋىنەن كۇشتەپ الىپ كەتۋگە تىرىسقان
بۇگىن ينتەرنەتتە بەلگىسىز ايەلدىڭ بالالاردى ەركىنەن تىس ماجبۇرلەپ اكەتۋگە تىرىسقان ۆيدەوسى جاريالاندى. سوت شەشىمىمەن اناسى بالالارىن كۇيەۋىنىڭ ۇيىنەن الىپ كەتۋگە كەلگەن. ءبىراق، ولار اناسىنا بارۋدان باس تارتتى. پوليتسيانىڭ مالىمەتىنشە، جانجالدان كەيىن ءۇش بالا اكەسىنىڭ جانىندا قالعان.
«وقيعا 2-قازان كۇنى باسقۇدىق اۋىلىندا بولعان. ازاماتشا بۇرىنعى كۇيەۋىنىڭ سوت شەشىمىنە سايكەس بالالاردى بەرمەي وتىرعانىن ايتىپ جۇگىندى. كامەلەتكە تولماعاندار ىستەرى جونىندەگى ينسپەكتور، سونداي- اق ۋچاسكەلىك ينسپەكتوردىڭ كومەكشىسى بالالاردىڭ تۇرعىلىقتى جەرىنە باردى. ءبىراق ولار بۇل ازاماتقا الدىن الا ەسكەرتتى. ەگەر بالالار اناسىمەن بىرگە بارۋدان باس تارتسا، وندا ەشكىم ولاردى ماجبۇرلەمەيدى جانە پسيحيكاسىنا زاقىم كەلتىرمەيدى. اكەسىنە قامقورشىلىق بولىمىنە جۇگىنۋگە كەڭەس بەردىك، ءبىراق ول باس تارتتى. بالالار اكەسىنە ورالدى. پوليتسيا قىزمەتكەرلەرى بالالاردىڭ اناسىمەن بىرگە بارعىسى كەلمەيتىنىن كورىپ، وسى ازاماتشا مەن ونىڭ ادۆوكاتىنان سوت پريستاۆىمەن بىرگە كەلۋدى ءوتىندى» دەپ حابارلادى ماڭعىستاۋ وبلىسىنىڭ باس پوليتسەيى، گەنەرال- مايور ج. باقتىبايەۆ.
