ق ر ىشكى ىستەر ءمينيسترى ءوز بالالارىن ۇرىپ-سوققان اكەنىڭ ىسىنە قاتىستى پىكىر ءبىلدىردى
«تۇرمىستىق جانجال سالاسىنا قاتىستى قۇقىق بۇزۋشىلىق جانە قىلمىس ءبىرجاقتى بولمايدى، ونىڭ ەكىنشى جاعى بولاتىندىعىنا نازار اۋدارعىم كەلەدى. تۇركىستان وبلىسىنداعى جاعدايعا كەلسەك، بالالاردىڭ اناسى بۇعان دەيىن دە كۇيەۋىنىڭ ۇستىنەن بىرنەشە رەت شاعىم تۇسىرگەن، ءبىراق ارىز جازباعان. ول ونىڭ زاڭدى ايەلى، كۇيەۋىنەن اجىراسۋعا ءوتىنىش بەرمەگەن. بۇل جەردە پوليتسەيلەردىڭ جۇمىسىن ايقىندايتىن وزىندىك زاڭنامالىق تۇستار بار. ياعني، ءبىز شاعىمسىز ول ايەلدىڭ جولداسىن 3 ساعاتتان ارتىق قاماۋدا ۇستاي المايمىز. سونداي-اق، سەبەپسىز اكىمشىلىك جاۋاپكەرشىلىككە دە تارتا المايمىز»، - دەدى ە. تۇرعىمبايەۆ تىلشىلەردىڭ سۇراعىنا جاۋاپ بەرە وتىرىپ.
ەستەرىڭىزگە سالا كەتسەك، پوليتسەيلەر 4-قازان كۇنى الەۋمەتتىك جەلىلەرگە مونيتورينگ جۇرگىزۋ كەزىندە ەر ادامنىڭ كامەلەتكە تولماعان بالانى ۇرىپ-سوعىپ جاتقان بەينەجازبانى انىقتادى. اتالعان جايت سوتقا دەيىنگى تەرگەۋ تىزىلىمىنە ق ر ق ك 110-بابى 2-بولىگى «ازاپتاۋ» بويىنشا تىركەلدى. كوپ ۇزاماي ءتارتىپ ساقشىلارى بالالارىن ۇرىپ-سوققان اكەنى ۇستادى.
اۆتور: ءالي يبرايەۆ
