ماسكەۋلىكتەرگە قازاق ءتىلىن ۇيرەتەتىن جاڭا جوبا اشىلدى
قوس قىزدى قازاق ءتىلىنىڭ اۋەزدىگى باۋراپ العانى سونشالىق، ءتىلدى ۇيرەنۋدى قولعا الىپتى. جاڭا جوبادا تۋعان قالاسى مەن حالقى جايلى قازاقشا اڭگىمەلەيدى.
وسىدان بىرنەشە جىل بۇرىن ەكى ماسكەۋلىك قىزدىڭ قازاقشا ءان ايتقان بەينەجازباسى الەۋمەتتىك جەلىنىڭ بىرىندە پايدا بولىپ، ارتىنشا حالىق اراسىندا كەڭىنەن تاراپ كەتىپ ەدى عوي. كەيىن الگى ەكى قىز ەندى تۋعان قالاسى مەن ونداعى تۇرعىندار تۋرالى قازاقشا بايانداۋدى قولعا الادى. ءتىل ۋنيۆەرسيتەتىن بىتىرگەن بويجەتكەندەر قازىر PR سالاسىندا جۇمىس ىستەگەنمەن، بوس ۋاقىتتارىن سول جوباعا ارناپ كەلەدى.
«ءبىز بۇل جوبانى قازاق تىلىندە ءوزىمىزدىڭ دە وزگەلەردىڭ دە كوڭىلىن كوتەرەتىن، جاقسى ءىس بولسىن دەپ قولعا الدىق. جانە ۇيرەنىپ جاتقان ءتىلىمىزدى ۇمىتىپ قالمايىق دەگەن ويمەن باستادىق. شىنىندا وزىمىزگە ءتان ءارى ەل كوڭىلىنەن شىققان جوبا بولدى. قازىر قازاق ءتىلىن ۇيرەنىپ جاتىرمىن جانە مەن ءجيى قاتە جاسايمىن. ءبىراق مەنىڭ ويىمشا، ءار شەت ءتىلدى ۇيرەنگەندە قورىقپاۋ كەرەك»، - «موسكۆا قازاقشا» جوباسىنىڭ اۆتورى اناستاسيا رەشەتنيكوۆا.
«ەڭ باستىسى، قولعا العان ءىسىمىز كوپشىلىككە ۇنادى. ءوز باسىم «ماعان قاراڭىزدار مەن قازاقشا بىلەمىن» دەپ دابىرا ەتۋدى، ۇپاي جيناۋدى نەمەسە ءوزىمدى جارنامالاۋدى كوزدەگەن جوقپىن. ءبىز مۇنى شىن جۇرەكتەن ءارى وزىمىزگە ۇناعان سوڭ جاسادىق»، دەدى اتالعان جوبانىڭ تاعى ءبىر اۆتورى ەليزاۆەتا وسيپوۆا.
ۋاقىت وتە قوس قىز بەينەبلوگتى ءتۇرلى فورماتتا جۇرگىزە باستادى. پاندەميا جاريالانىپ، ۇزاق ۋاقىت وقشاۋلاۋ كەزىندە «كارانتيندىك قازاق ءتىلى» ايدارىن اشتى. ماسكەۋدەگى قازاقتاردان سۇحبات الىپ، جۇرتقا ۇسىندى. «سۇحبات جازىپ، سونى جوبانىڭ ءبىر بولىگى رەتىندە ۇسىنساق دەگەن وي كەلدى. العاشقى سۇحباتتى «حور تۋرەتسكوگو» ءانشىسى اليبەك المادييەۆتەن الدىق. سودان كەيىن وسى جۇمىستى جالعاستىرۋدى شەشىپ، گۇلناز بالپەيسوۆامەن كەزدەستىك. يمانبەك، ايسۇلتان سەيتوۆ جانە سكريپتونيتپەن سۇحباتتارىمىز وتە قىزىقتى بولىپ شىقتى»، - دەپ تولىقتىردى اناستاسيا رەشەتنيكوۆا.
ناستيا مەن ليزا قازا ءتىلىن العاش رەت ۋنيۆەرسيتەتتە ەستىگەن. قازاقستان تۋرالى دا از بىلگەن. ءبىراق العاشقى ەكى ايدىڭ ىشىندە قازا ءتىلىن تۇرمىستىق دەڭگەيدە سويلەسە الاتىنداي دارەجەگە جەتەدى. ال 4 جىلدا تىلدىك ورتادا بولماي- اق ءوز ويلارىن ەركىن جەتكىزىپ سويلەي الاتىن بولدى.
