ەسكى زەلانديا قايدا؟

ەسكى زەلانديا دەگەن جەر بار. ءبىراق ول جاڭا زەلانديادان مىڭداعان شاقىرىم الىستا جاتىر.

جالپى جاڭا زەلانديا - ادام بالاسى كەيىنىرەك قونىستانعان ايماق. قازبا دەرەكتەرگە كوز جۇگىرتسەك، ارالدا تابىلعان العاشقى ادامنىڭ ءمايىتى ءبىزدىڭ زامانىمىزعا دەيىنگى 13- عاسىرعا تاپ كەلەدى. دەمەك، ارالعا ادام اياعى تيگەن ءداۋىر وسى كەزەڭ بولسا كەرەك. بۇل ارال - پولينەزەي تايپالارىنىڭ جەرى. ولار - وڭتۇستىك تىنىق مۇحيت ارالدارىن مەكەندەگەن حالىق.

ال ەۋروپالىقتاردىڭ اياعى بۇل ارالعا العاش 1642-جىلى ءتيدى. ابەل تاسمان باستاعان گوللاند زەرتتەۋشىلەرى ارالدى كارتاعا ءتۇسىرىپ، بۇل مەكەندى وڭتۇستىك امەريكا قۇرلىعىنا جاتاتىن ارال دەپ ۇققان. ءبىر قىزىعى، سول ويعا وزدەرى دە سەنىمدى بولعان. وڭتۇستىك امەريكا مەن زەلانديانىڭ اراسى وتە الىس ەكەنىن مولشەرلەي الماعان كورىنەدى. ونىڭ ۇستىنە، مۇحيت داۋىلى اداستىرىپ كەتسە كەرەك.

ەلگە ورالعان ابەل گەوگرافيا قوعامىنا ساياحاتى جايلى ەسەپ بەرىپ، اشقان ارالىن وڭتۇستىك امەريكاعا جاقىن جاتقان مەكەن دەپ تۇسىندىرەدى. الايدا دات كارتوگرافى، ساياحاتشى براۋۆەر حەندريك ەكسپەديتسيا مالىمەتتەرىن تالداي كەلە، ونداي مەكەننىڭ وڭتۇستىك امەريكا قۇرلىعىنا كىرىكپەيتىنىن ۇعادى. سودان الىس جاتقان بۇل مەكەندى جەردىڭ بولەك ءبىر بولىگى دەپ جورامال جاساپ، ءوزى تۇرىپ جاتقان پروۆينتسيانىڭ - زەلانديانىڭ (Zeeland) اتىن بەرەدى.

دات تىلىنەن اۋدارعاندا «زەلانديا» ءسوزى «مۇحيت ەلى» دەگەن ماعىنانى بىلدىرەدى.

ال جەر بەتىنىڭ اتلاسى جاسالعان كەزدە، دانياداعى زەلانديا مەن تىنىق مۇحيتىندا جاتقان ارالدى شاتاستىرىپ الماس ءۇشىن، بىرەۋىنە «جاڭا زەلانديا» دەگەن اتاۋ بەرىلەدى. ارالدان مۇلدەم الىستا، جەردىڭ بولەك ءبىر قۇرلىعىندا جاتقان شاعىن پروۆينتسيانىڭ «ەسكى زەلانديا» ەكەنىن ۇشەۋ بىلسە، تورتەۋ بىلمەس...

ال كارتانىڭ ءدال سىزباسىن جاساعان - جەيمس كۋك. ول ابەلدەن كەيىن ءبىر عاسىردان سوڭ، 1769- جىلى ارالعا بارعان.

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى