تۇركىستان وبلىسىندا «اقىلدى» مال بورداقىلاۋ الاڭى ىسكە قوسىلدى
تۇركىستان وبلىسى اكىمىنىڭ باسپا ءسوز قىزمەتىنەن ءمالىم ەتكەندەي، قۇرىلىسى ەكى جىلعا جالعاسقان الاڭنىڭ جالپى اۋماعى - 0,5 گەكتار. 300 مال باسىنا ەسەپتەلگەن شارۋاشىلىققا انگۋس تۇقىمدى 32 باس ءىرى قارا پەتروپاۆل وبلىسىنان جەتكىزىلگەن.
مۇنداعى بارلىق «قارا جۇمىستى» ارنايى قوندىرعى، روبوت اتقارادى. مال شارۋاشىلىعىن كاسىپ ەتكەن جەرگىلىكتى تۇرعىن داۋرەن الىمبايەۆ وسىلايشا ءوز ارمانىن جۇزەگە اسىرعان.
«حوببي رەتىندە باستاپ، ىزدەنىپ، ءتيىستى مامانداردان كەڭەس الدىم. بۇل سالانىڭ سىرلارىن جەتىك بىلمەگەندىكتەن، قيىندىقتارعا تاپ بولعانىم راس. اۋدان اكىمىنىڭ قابىلداۋىندا بولىپ، قۇجاتتاندىرۋ، سۋبسيديالاۋ جاعىنان كومەك سۇرادىم»، - دەيدى جەكە كاسىپكەر.
روبوتتاندىرىلعان مال بورداقىلاۋ الاڭىندا 1 عانا ادام جۇمىس ىستەيدى. جۇمىستىڭ باسىم بولىگىن رەسەيدەن ساتىپ الىنعان «مالاق تازالاۋ» قۇرىلعىسى اتقارادى.
كاسىپكەر بيزنەسىن ارى قاراي دامىتۋ ءۇشىن مەملەكەتتەن از مولشەرلى پايىزبەن نەسيە الماق.
وسىلايشا شارۋاشىلىعىن كەڭەيتىپ، جىلقى، قوي بورداقىلايتىن، ءسۇت وندىرەتىن فەرما سالۋدى كوزدەيدى.
