ب ۇ ۇ جارعىسىنداعى مۇرات-ماقساتتار كادەگە اسپايدى دەگەن پىكىرمەن مۇلدە كەلىسپەيمىن - قاسىم-جومارت توقايەۆ
بۇل تۋرالى ب ۇ ۇ باس اسسامبلەياسىنىڭ ونلاين فورماتتا وتكەن 75-سەسسياسىندا قازاقستان پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«COVID-19 ىندەتىن اۋىزدىقتاۋ اسا قيىن بولىپ وتىر. الەمدە جاپپاي قارۋلانۋ ۇدەرىسى قايتادان بەلەڭ الىپ كەلەدى. ستراتەگيالىق دامۋ ماقساتتارىن جۇزەگە اسىرۋ ءىسى تۇرالاپ قالدى. ب ۇ ۇ جارعىسىندا بەكىتىلگەن مۇرات-ماقساتتار بۇدان بىلاي كادەگە اسپايدى دەگەن پىكىر تاراۋدا. مەن ءوز ەلىمنىڭ پرەزيدەنتى جانە ب ۇ ۇ- نىڭ بۇرىنعى جوعارى لاۋازىمدى تۇلعاسى رەتىندە بۇل كوزقاراسپەن مۇلدە كەلىسپەيمىن. بۇعان قاراماستان، ءبىز ءۇمىت وتىن وشىرمەي، قايتا ونى لاۋلاتۋىمىز كەرەك؛ ورتاق مۇرات-ماقساتتان باس تارتپاي، وعان قول جەتكىزۋ ءۇشىن كۇش-جىگەرىمىزگە تىڭ سەرپىن بەرۋىمىز قاجەت؛ انارحياعا جول بەرمەي، حالىقارالىق قۇقىققا نەگىزدەلگەن قوعامداستىق قۇرۋدى جالعاستىرۋعا ءتيىسپىز»، - دەدى مەملەكەت باسشىسى.
قازاقستان پرەزيدەنتىنىڭ اتاپ وتۋىنشە، بۇل - وتە كۇردەلى مىندەتتەر.
«الداعى ونجىلدىق 2030-جىلعا دەيىنگى ورنىقتى دامۋدىڭ كۇن تارتىبىندە تۇرعان مىندەتتەرىن جۇزەگە اسىرۋ جانە قازىرگى زامانعى داعدارىستاردى ەڭسەرۋدىڭ ءتيىمدى جولىن تابۋ ءۇشىن شەشۋشى كەزەڭ بولادى. بۇل اۋقىمدى ماقسات ورتاق كۇش-جىگەردى جانە جاۋاپكەرشىلىكتى تالاپ ەتەدى. ءبىز باس حاتشى انتونيۋ گۋتەرريشتىڭ تاباندى كوشباسشىلىق قىزمەتىنە ريزاشىلىق بىلدىرەمىز. سونداي-اق، ونىڭ بىرىككەن ۇلتتار ۇيىمىنداعى تيىمدىلىكتى، اشىقتىق پەن ايقىندىقتى ارتتىرۋ جونىندەگى قازىرگى جۇمىسىنا قولداۋ كورسەتەمىز»، - دەدى قاسىم-جومارت توقايەۆ.
مەملەكەت باسشىسى قازاقستان ب ۇ ۇ- نىڭ ميسسياسى مەن جارعىسىن بەرىك ۇستاناتىندىعىن باسا ايتتى.
«سونىمەن قاتار، ەلىمىز تۇراقتى، ادىلەتتى جانە وركەندەگەن الەم قۇرۋ جولىنداعى ورتاق مىندەتتى جۇزەگە اسىرۋعا اتسالىسادى. بىرىككەن ۇلتتار ۇيىمى اۋقىمدى ءارى بىردەن-ءبىر امبەباپ حالىقارالىق ۇيىم رەتىندە شىن مانىندە بالاماسىز بولىپ قالا بەرەتىنىنە سەنىمدىمىن»، - دەدى قازاقستان پرەزيدەنتى.
ەسكە سالايىق، كەشە نيۋ-يوركتە بۇۇ باس اسسامبلەياسىنىڭ مەرەيتويلىق 75-سەسسياسى ءوتتى. وندا ق. توقايەۆ شارا قاتىسۋشىلارىنا بەينەۇندەۋ جولدادى.
