قازاقستاندا اسا قاۋىپتى ءۇش قىلمىستىق توپتىڭ جولى كەسىلدى
نۇر-سۇلتان، الماتى، اقتوبە جانە قوستاناي قالالارىنداعى ارنايى وپەراتسيا شەڭبەرىندە اتالعان توپتاردىڭ 15 جەتەكشىسى مەن بەلسەندى مۇشەلەرى ۇستالدى، ولاردىڭ بىرەۋى رەسەي فەدەراتسياسىندا بانديتيزم مەن ادام ولتىرگەنى ءۇشىن حالىقارالىق ىزدەستىرۋدە بولاتىن. اتىس قارۋىنىڭ، وق-دارىلەر مەن گراناتالاردىڭ ارسەنالى الىندى.
ۇستالعاندار نۇر-سۇلتان قالاسى پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالىپ، قولدا بار دالەلدەمەلەردى بەكىتۋ جانە قىلمىستىق ارەكەتتىڭ وزگە دە ەپيزودتارىن انىقتاۋ بويىنشا تەرگەۋ ءىس-شارالارى جۇرگىزىلۋدە.
كارانتيندىك شەكتەۋلەر جاعدايىندا قىلمىستىق توپتار وزدەرىنىڭ قىلمىستىق بەلسەندىلىگىن تومەندەتپەي، ەكونوميكالىق قيىندىققا تاپ بولعان كاسىپكەرلەردەن قورقىتىپ الۋمەن جانە رەيدەرلىكپەن اينالىسۋدى جالعاستىرعان. بوتەننىڭ مۇلكىن الىپ قويۋ كەزىندە ولار اتىس قارۋى مەن دەنە كۇشىن قولدانۋ ارقىلى دورەكىلىك پەن قاتىگەزدىك تانىتقان.
وسى جاعدايلاردا ەل باسشىلىعى قۇزىرەتتى ورگاندار ءۇشىن بەيبىت ازاماتتارعا بانديتتىك ەلەمەنتتەر تاراپىنان قاۋىپ- قاتەرلەردى جويۋ، قوعامنىڭ 90-جىلدارداعى «رەكەتيرلىككە» قاراي قۇلدىراۋىنا جول بەرمەۋ بويىنشا مىندەتتەردى باسىمدىلىقتار قاتارىنا قويىپ وتىر.
ارناۋلى قىزمەتتەر مەن پوليتسيانىڭ قىلمىستىق توپتاردىڭ جوسپارلارى مەن نيەتتەرىن انىقتاۋ جانە ونىڭ جولىن كەسۋ بويىنشا جۇيەلى جۇمىسى جالعاسۋدا.
