اجىراسقان ەرلى- زايىپتىلار قايتادان وتباسى قۇرۋعا اسىقپايدى - مامان
«ماڭعىستاۋ ايەلدەر كوشباسشىلىعى مەكتەبى» قوعامدىق بىرلەستىگى وتكىزگەن شارانىڭ ماقساتى - قازىرگى قوعامداعى وتباسى ماسەلەلەرىن تالقىلاۋ. جاس وتباسىلارعا نەكە ماسەلەلەرىن شەشۋگە كومەكتەسۋ.
«ماڭعىستاۋ ايەلدەر كوشباسشىلىعى مەكتەبى» قوعامدىق بىرلەستىگىنىڭ ءتورايىمى روزا ماحانبەتوۆانىڭ ايتۋىنشا، قازىرگى قوعامداعى وتباسى ينستيتۋتى قولداۋ مەن قورعاۋدى قاجەت ەتەدى. سەبەبى، بۇگىندە وتباسى قۇندىلىقتارى مەن پرينتسيپتەرى السىرەگەن.
«بۇگىندە جاستار ماتەريالدىق قۇندىلىقتاردى جوعارى قويادى. ولار قوعامنىڭ ۇياشىعىن قۇرۋدان گورى اقشا تابۋعا كوبىرەك قىزىعۋشىلىق تانىتادى. وتباسىلىق قاتىناستارداعى پروبلەمالار اجىراسۋعا اكەلەدى. الايدا، ءار ادام ەرتە مە، كەش پە، وتباسى كەرەك ەكەنىن تۇسىنەدى. وتباسىنىڭ نەگىزى - زاڭدى نەكەگە بەكىتىلگەن جۇپ»، - دەدى روزا ماحانبەتوۆا. بىرلەستىك ءتورايىمى بۇگىندە جاستار اراىندا بەلەڭ العان ازاماتتىق نەكە تاقىرىبىن كوتەردى.
«ەلىمىزدە اجىراسۋ ستاتيستيكاسى جىل سايىن ارتىپ كەلەدى. بىرنەشە جىل بىرگە جانە باقىتتى ءومىر سۇرگەننەن كەيىن دە ەرلى- زايىپتىلار اجىراسۋ تۋرالى شەشىم قابىلدايدى. سالدارىنان قانشاما وتباىنىڭ شاڭىراعى شايقالدى. بالالاردىڭ پسيحولوگياسى بۇزىلدى. ەرلى- زايىپتىلار ەكى جاققا كەتكەننەن كەيىن ءوز باقىتىن تاۋىپ، قايتادان وتباسى قۇرۋعا اسىقپايدى. كوبىنە ازاماتتىق نەكەدە تۇرادى»، - دەدى ول.
اۆتورى: اسەل تۇماش قىزى
