ورىسءتىلدى دە، ارالاس مەكتەپتىڭ دە ديرەكتورى قازاقشا ءبىلۋى كەرەك - ورازكۇل اسانعازى
«ەلباسى نۇرسۇلتان نازاربايەۆ قازاقستان حالقى اسسامبلەياسىنىڭ وتىرىسىندا «2020 - جىلى مەكتەپ وقۋشىلارى 100 پايىز قازاق ءتىلىن مەڭگەرەدى» دەگەن ەدى. ەشكىمدى سىناۋدان اۋلاقپىن. الايدا، وسى «دوڭگەلەك ۇستەلگە» ءبىلىم جانە عىلىم مينيسترلىگىنەن كەلىپ وتىرعان وكىلگە ءوتىنىش: الداعى وقۋ جىلىن جاڭاشا باستاساڭىزدار. ارالاس مەكتەپتەردى قازاق مەكتەپتەرىنە اينالدىرۋ ءۇشىن نە ىستەدىڭىزدەر؟ قوعامداعى «قازاق مەكتەبىندەگى بالالاردىڭ ءبىلىمى تومەن» دەگەن تۇسىنىكتىڭ جالعان ەكەنىن انىق بىلەمىن. مىسالى ەلورداداعى «دارىن» مەكتەبىن بىتىرگەن 45 بالانىڭ 43- ءى گرانتقا ءتۇستى. نەگە ءبىز وسىنى ايتپايمىز؟»، - دەپ ساۋال تاستادى ورازكۇل اسانعازى «وتباسى كۇنى» اياسىندا ۇلتتىق تاربيە بەرۋ مەن وتباسى قۇندىلىقتارىن دامىتۋ ماسەلەلەرى تالقىلانعان دوڭگەلەك ۇستەل وتىرىسىندا.
ونىڭ ايتۋىنشا، ەلوردادا وسىدان بىرنەشە جىل بۇرىن 14 كورسەتكىش بويىنشا استاناداعى ۇزدىك 10 مەكتەپ انىقتالعان. سول ءبىلىم وردالارىنىڭ توعىزى - قازاق مەكتەپتەرى بولىپ شىقتى.
«نەگە ءبىلىم باسقارمالارى وسى كورسەتكىشتەردى گازەتتەرگە جازبايدى، ناسيحاتتامايدى؟ قازاق ءتىلىن ناسيحاتتاۋ باعىتىندا دا قازاق گازەتتەرى ونداعان ماتەريال جاريالاسا، ورىس تىلىندەگى باسىلىمدار ءبىر- ەكەۋدەن اسپايدى. سوۆەت وكىمەتى اقىماق بولعان جوق. الماتىدا، شىمكەنتتە جانە سەلينوگرادتا ءبىر عانا قازاق مەكتەپتەن بولعان. ماقۇل، قالانىڭ ءتورت بۇرىشىنا ءتورت ورىس مەكتەبىن قالدىرايىق تا، قالعانىنىڭ ءبارىن قازاق مەكتەپتەرى ەتۋ كەرەك. ول ءۇشىن مەكتەپتەر اتا- انالارمەن جۇمىس ىستەۋى ءتيىس.
«ءبارى وتباسىنا بايلانىستى» دەيمىز. ءبىراق وتباسىنى، ادامدى كىم تاربيەلەيدى؟ ۇستاز! ۇستاز ءوزىنىڭ ءبىلىمىنىڭ جوعارى ەكەنىن اتا- انانىڭ الدىندا دالەلدەۋى ءتيىس. قازاق ءتىلىنىڭ ۇلتارالىق تىلگە اينالۋى ءۇشىن بىردە- ءبىر قادام جاساماي وتىرعان مەكتەپتەر بار. 50 توپتا بىردە- ءبىر قازاق توبى جوق كوللەدجدەر بار. سوندىقتان ءبىلىم جانە عىلىم مينيسترلىگىنەن ءوتىنىپ سۇرايتىنىم: ءتىلدى جولعا قويۋ ءۇشىن ءتيىستى بۇيرىق شىعارۋ كەرەك. ورىسءتىلدى دە، ارالاس مەكتەپتىڭ دە ديرەكتورى قازاقشا ءبىلۋى كەرەك. باياعىدا ءبىزدىڭ تۇستا ورىسشا بىلمەگەن ادامعا قىزمەت بەرمەي قويعان. سوندىقتان ورىس مەكتەپتەرىن ارالاس، ال ارالاس مەكتەپتەردى قازاق مەكتەپتەرىنە اينالدىرۋىمىز كەرەك»، - دەپ پىكىرىن ءبىلدىردى قوعام قايراتكەرى.
اۆتور: ايان بەكەن ۇلى
