اياگۇل ميرازوۆا: ۇلتتىق مەكتەپ جايلى جاسقانباي ايتاتىن كەز كەلدى
«تاۋەلسىزدىك العان كەزدەن باستاپ ەلباسى ءداستۇرلى جولداۋلارىندا، ونىڭ ىشىندە «بولاشاققا باعدار: رۋحاني جاڭعىرۋ»، «ۇلى دالانىڭ جەتى قىرى» ماقالالارىندا وتباسىلىق ينستيتۋت ماسەلەسى جايلى جازعان ەدى. مەملەكەت باسشىسى دا ءبىلىم كۇنى ەلدىڭ بارىنە ەرەكشە وي سالىپ، قازاقستان حالقىنا جولداۋىن جاريالادى. قۋانىشىمىزدا شەك جوق. ويتكەنى ۇلتتىڭ جاڭا بولمىسىن قالىپتاستىرۋعا ارنالعان تاراۋىندا ادامدى جانە قوعامدى ۋاقىت تالابىنا ساي جەتىلدىرۋ قاجەتتىگىن ءومىردىڭ ءوزى كورسەتىپ وتىرعانىن جەتكىزدى»، - دەدى اياگۇل ميرازوۆا «وتباسى كۇنى» اياسىندا ۇلتتىق تاربيە بەرۋ مەن وتباسى قۇندىلىقتارىن دامىتۋ ماسەلەلەرى تالقىلانعان دوڭگەلەك ۇستەل وتىرىسىندا.
اكادەميكتىڭ ايتۋىنشا، قازاق بالالارىن تاربيەلەۋدە ۇلتتىڭ ويشىلدارىنىڭ تاعىلىمىن باسشىلىققا الۋىمىز كەرەك. «باتىستىڭ بىزگە جاقسىسىمەن بىرگە جامانى دا ەنىپ كەتتى. مىنە، سول ءۇشىن بىلىمنەن بۇرىن - تاربيە تۇرۋى كەرەك.
جاڭا جولداۋدا «ۇلتتىڭ ساپاسىن انىقتايتىن قۇندىلىقتار رەتىندە ءبىلىم، ەڭبەك، كاسىپ، تەمىردەي ءتارتىپ، جاۋاپكەرشىلىك، ادىلدىك، تياناقتىلىق، ۇقىپتىلىق اتالىپ ءوتتى. وسىنىڭ ءبارى جانۇيادان باستالىپ، بالاباقشا مەن مەكتەپتە شىڭدالاتىن قاسيەتتەر. ءوزىم 25 جىل ديرەكتور بولدىم. قازىر بىزدە قازاق جانە ورىس مەكتەپتەرى بار. بۇرىن ۇلتتىق مەكتەپ دەگەندى كوپ ايتا المادىق. ەندى ءقازىر ايتاتىن كەز كەلدى»، - دەيدى ول.
اياگۇل ميرازوۆانىڭ سوزىنشە، ءتىلىمىزدىڭ قولدانىس اياسىن بارىنشا كەڭەيتۋدىڭ ارقاسىندا مەملەكەتىمىزدىڭ بولاشاعىن جارقىن ەتۋگە بولادى. «سوندىقتان وتباسى قۇندىلىقتارى نەگىزىندە ۇلتتىق تاربيە بەرۋ ماسەلەسىمەن اينالىسقاندا جاڭا كوزقاراس، جاڭا ۇستانىم كەرەك»، - دەيدى ول.
اۆتور: ايان بەكەن ۇلى
